Den e proceso di Plataforma PITA: --- ORANJESTAD (AAN) – SueAnn Ras, a clausura el conferencia di prensa di e Plataforma Intervencion Trempan Aruba, cu a tuma lugar Diabierna ultimo.
Ras a gradici tur e profesionalnan cu tabata presente durante e proceso di henter e siman; nan tabata 14 stakeholders en total, y cada un a duna su aporte di manera cu nan por a yega na algo concreto, sistematico y duradero locual ta importante; y trahando cu tur hende na bienestar di e muchanan.
“E fase di cero pa 4 aña ta keda uno fundamental, y eigenlijk, ta un derecho di nos muchanan tambe, cu nan ta haya un servicio completo, pa locual ta trata ora nan tin necesidadnan special.
Riba esey, nos ta enfocando aworaki y nos ta cuminza, manera mi coleganan a bisa caba, den e centronan di cuido cu e proyecto piloto, unda cu nos ta bay diseña un sistema cu nos por uza na Aruba y nos ta brinda nos muchanan un intervencion profesional trempan, pa asina nan por haya e oportunidad husto pa nan por desaroya completamente, y no pone nan un banda” SueAnn Ras a expresa.
El a agrega cu e ta sumamente orguyoso di Anouk cu ta liderando e proyecto, di Carolina cu ta trahando cu curazon, y banda di esey cu nan ta haya e sosten tecnico di Universidad di Missouri, cu ta un tremendo Universidad cu cual nan ta trahando hunto aworaki. Y claro, sin laga afo e mayornan y e profesionalnan cu ta den veld trahando diariamente cu e muchanan special.
“Mi ta kere e ta bira un plan, maneho nacional completo, na unda cu nos tur lo por cargue, y esaki nos ta hacie den un periodo di crisis unda cu nos ta actualmente, pero e ta pone bo bira mas creativo cu locual bo por haci cu loke tin caba, anto nos no ta perde e tipo di touch humano ora cu nos tin un presion asina grandi riba e aspecto financiero, unda cu nos por saca e miho di nos” Sue Ann a bisa. El a remarca cu tin un gap den e edad crucial cu ta di 0-4 aña pa yuda e muchanan aki.
