ORANJESTAD (AAN) –Sue-Ellen de Freitas-Sousa, Head Business Information & Support di Camara di Comercio y Industria (KvK), tambe a hiba palabra den conferencia di prensa reciente.
El a referi na e tema di “ oportunidad di cancelacion y likidacion” den e sector empresarial. Señora de Freitas a cuminza pa splica cu den e aspecto aki por mira cu tin cierto confusion, y ta algo cu KvK ta confronta cune frecuentemente.
El a splica e diferencia entre actividadnan comercial y ora un negoshi ta stop di existi completamente. El a señala tambe cu ta importante pa tene na cuenta unda cu e forma legal ta haci un diferencia.
Señora de Freitas a señala cu loke ta pasa hopi biaha ta, cu e comerciante ta cera su tienda, por ehemplo door di termina e contacto cu e cliente pero no ta finaliza e proceso na Camara di Comercio. Pues mester tene na cuenta cu na momento cu un negoshi stop di opera esaki no ta cancela definitivamente. Cancelacion di un negoshi ta sosode na momento cu e comerciante ta registra esaki den e data base di Camara di Comercio. Esaki ta haci oficialmente, cu e negoshi ta cera. Si no haci esaki e negoshi ta keda activo den e sistema di KvK y esey ta conduci na e hecho cu Departamento di Impuesto tambe ta haya como informacion, cu e negoshi ta activo, cu e consecuencianan cu esaki por tin.
El a agrega cu e parti unda cu e persona tin un entidad legal, un NV of un VBA y e ta director di esaki e por haci un escogencia, si e ta para pa un tempo su actividadnan comercial. Esaki ta pasa si e persona tin intencion di reanuda e actividad comercial, y e tin su statutonan caba y su vergunning “in place”. Mester tene na cuenta cu ora e persona kier para su actividad comercial pa un tempo, e tin cu sigui haci e contribucion na Camara di Comercio, su declaracion di impuesto, cu logicamente ta bay ta na cero, pero mester sigui cumpli cu esaki.
Na momento cu e persona sa cu e no ta bay tin nada di haber mas cu su negoshi, y e intencion ta pa e wordo cancela oficialmente, akinan tin cu pasa den e proceso di likidacion di e NV of BVA. Esaki tin algun procedure su tras cu mester cumpli cune pa por finaliza esaki, de Freitas a acentua.
