Revolucion tecnologico di Siglo 21 a duna un contenido nobo na religion
*Pasco Grandi 2025 a entrega exigencia lider nobo pa 1.4 Biyon Catolico
*Nucleo moral di grupo mundial creciente cu demanda firme pa religion
ORANJESTAD (AAN) — Pasco Grandi den e ciclo di observacion spiritual di religion Catolico Romano, ta hunga un papel sumamente importante. Ta den e hecho cu Cristo a vence morto, e punto central di religion Catolico mester wordo busca.
Mas cu Dos Mil aña pasa, Iglesia Catolico a nace den filosofia cu hende ta sigui biba aunke nan no ta visibel mas a base di e Resureccion di Cristo, cu e grupo di Apostelnan mester a anuncia na henter mundo durante resto di historia humano cu lo drenta un epoca nobo cu regreso di Cristo y regreso di hende na e mundo perfecto cu originalmente a wordo crea.
Filosofia Cristian a conkista mundo y cifranan ta indica cu e cifra mundial di Cristiannan ta sigui crece y den e totalidad aki e cifra di Catoliconan cu segun metodonan moderno di research a conoce crecemento di 1.15 porciento entre 2022 y 2023.
Esaki ta nifica cu Iglesia Catolico na e momentonan aki mester di un lider nobo pa guia un grupo creciente rond mundo, pero cu profilacion diferente.
Un investigacion cu a wordo haci acerca di religion y e comunidad Cristian mundial, na e momentonan aki sigur ta hunga un papel importante den liderazgo di Iglesia Catolico, cu durante Siglonan 2020 y 2021, a conoce desaroyonan sumamente importante den un mundo di cambio den cual conocemento humano a cuminsa duna muestra di por influencia religiosidad.
Con den un situacion mundial di cambionan grandi, un Iglesia cu ta tene na principionan cu a nace 2025 aña pasa ora e Apostelnan a haya e encargo pa plama Iglesia rond mundo, por mantene su mes?
Si awe cifranan ta guia e base necesario pa comprende e papel di un Papa nobo pa reemplaza Papa Francisco, ta pasobra Iglesoa Catolico mester a adapta su mes na e cambionan cientifico y den esaki pues uza metodonan moderno pa por atende cu e encargo di un Iglesia, cu pa ser Iglesia mester ta parti directo di un comunidad pa realmente por sirbi como poder y forza di e grupo spiritual cu e mester duna guia.
Mundo lo conoce un Papa, un dirigente nobo di tur miembro di religion Catolico, cu den cifranan ta haya expresion pa duna testimonio di con den diferente culturanan y asina costumbernan, Iglesia Catolico mester hiba e mensahe di Fe pero tambe atende cu e base di “loke ta bon y loke ta malo”, cu ta e base moral di un comunidad mundial den temponan di cambio asina importante.
Papa Francisco a tuma encargo di dirigente mundial di Catoliconan despues cu mundo a conoce lidernan mundial Catolico sumamente fuerte na momento di por ehempel avance Comunista cu ta enemigo di religion, cu Comunismo ta considera opium pa Pueblo.
Durante Siglo 20, Iglesia Catolico prome cu Comunismo a conoce e temporada di cambio.
Papa Pius XI (11), kende a dirigi Iglesia Catolico entre 1922 y 1939, a firma cu Italia e acuerdo cu a comberti Vaticano den un Estado Soberano, loke a duna e centro di Catolicismo un identidad soberano.
Tabata su sucesor Papa Pius XII, cu a introduci e dogma di infalibidad Papal, cu ta nifica cu Papa no ta faya den su trabou religioso.
Cambionan grandi a wordo introduci cu e Segundo Concilio Vaticano, cu a wordo habri pa Papa Juan, kende tabata sumamente popular.
Tabata Papa Pablo VI (6) cu como prome Papa a biaha pa Estados Unidos y a conclui Segundo Concilio Vaticano, cu a introduci cambionan grandi den Iglesia y a hiba Pueblo mas cerca di e realidad di celebracion di Iglesia.
Papa Juan Pablo 1 no tabata tin bida largo y a wordo sigui pa Papa Juan Pablo II, e Polaco cu a trece un epoca di renacemento den Iglesia, haciendo uzo di viahenan y oportunidadnan nobo cu inventonan mundial tabata introduci.
El a habri sin duda e caminda pa Vaticano a conoce un cambio grandi y a bira realmente e Iglesia den cual e feligres a haya un participacion enorme te awe.
Papa Benedicto, su siguidor a bira e prome Papa pa retira y a keda Papa Emiritus na momento cu Papa Francisco como prome Papa di America Latino, a asumi su encargo como dirigente di religion Catolico Romano na Maart 2013.
Retonan grandi mester a wordo atende dor di Papa Francisco sigur den e mundo di adelanto cientifico, cu a trece hende mas cerca otro pero a presenta situacionnan nobo di un comunidad mundial nobo, sigur riba tereno moral.
Papa Francisco a sabi di mantene Iglesia hunto dor di e respet cu el a duna y exigi pa hende como ser humano y crecion di Dios.
Esaki a bira e reto awor den e temporada di culminacion di Era di Inteligencia Artificial sigur, den cual e dignidad directo y derechonan humano ta bira central.
Papa Francisco a carga mundo den un epoca den cual moralidad a bira mucho mas cu un palabra skirbi y den cual e ser humano mester a bolbe ocupa su lugar central.
El a laga un encargo nobo pa su sucesor pa sigui dilanti den un mundo di cambio despues cu e mes a bandona mundo riba e fiesta di Pasco Grandi, fiesta cu a marca inicio di Iglesia Catolico, despues di a duna mundo su bendicion.
