Cambio politico na Hulanda a keda hancra den su decision
*Su decision di no bira Prome Ministro a habri porta pa Wilders
ORANJESTAD (AAN) — Cu eleccion 2023 na Hulanda lo a trece cambionan grandi, tabata un realidad pa cual DIARIO a prepara Aruba.
Un persona cu a bira central den e cambionan politico Hulandes, tabata Pieter Omtzigt, cu na 2021 a rementa mundo politico Hulandes cu e asina yama toeslagen affaire.
Tabata trata di un problema serio na Hulanda, caminda mayornan a wordo falsamente acusa dor di Estado Hulandes cu compensacionnan cu nan a ricbi y pa cual inhustamente nan a wordo persigui.
Den e situacion aki e persona di Pieter Omtzigt a bini dilanti sigur ora el a anuncia cu e ta bandona e partido Cristian Democrata CDA.
Kico su futuro politico sigur lo a encera a keda un misterio pa Reino ya cu pa hopi tempo e no kier a declara si e ta bini cu su propio partido, mientras e cantidad di votador cu tabata duna sosten a sigui crece.
Na cierto momento DIARIO mes a splica Aruba cu e tabata tin potencial pa bira e figura politico nobo di Hulanda cu a duna prueba di kier cambio despues di Rutte y a conoce e partido nobo di Boer Burgerbeweging tambe.
Sinembargo, tabata tin tur indicacion cu Omtzigt lo por a bira e lider grandi pero su forma di atende realmente cu politica tambe den su contra.
Crucial a bira e momento cu ora el a alcansa su punto mas halto, el a anuncia cu si e gana e no ta bira Prome Ministro di Hulanda pa medio di su partido nobo Nieuw Sociaal Contract e mes lo no acepta posicion di Prome Ministro.
Esaki a cuminsa afecta su imagen den Pueblo Hulandes y tabata tin como resultado su caida den voto mientras Wilders a cuminsa habri caminda pa victoria aplastante cu a sorprende Reino.
Awe Reino ta conoce e momento cu Omtzigt ta retira di politica, cu manera e mes ta bisa ta crea presionnan cu ta afecta su salud.
Su salida ta wordo considera un perdida pa politica Hulandes, ya cu su persona sigur a percura pa presenta necesidad di cambio den e forma cu for di 2010 Rutte a dirigi Hulanda.
Un tarea di sobrevivencia ta spera su partido Nieuw Sociaal Contract awor despues cu e como e lider cu a ricibi tur sosten, a hala un banda.
Manera DIARIO a pronostica y continuamente ta informa Aruba, mundo politico den Reino mester wordo vigila pa asina comprende tambe e posicion di Hulanda y Gobierno di Reino enfrente Aruba, cu no por bandona loke el a acorda cu Reino pa gobernacion total di e pais.
Historia di Reino sin duda a keda marca pa e realidad di Omtzigt cu tabata wordo considera como candidato pa Prome Ministro di Hulanda y cargador di un revolucion politico den Reino pero awor ta bandona politica.
