ORANJESTAD (AAN): Subway ta contento di por participa un biaha mas como co-patrocinador di e Aruba Wak & Run cu ta bay tuma lugar di 26 pa 29 di September.
Durante un conferencia di prensa Tai-Foo Lee di Subway a bisa cu e ta realiza cu e trabao pa organiza y tene un evento asina di 4 dia ta uno inmenso.
“Cu hopi orguyo y anticipacion nos ta sinta aki y ta cla pa e evento cu pa 2 aña no por a wordo organiza debi na e pandemia”.
Tin hopi interes y entusiasmo pa e evento, di parti di nos cliente, nos empleadonan y pueblo en general cu semper a gusta y a participa na e evento, segun Lee.
El a sigui bisa cu Subway tin e intencion di ‘match’ e donacion di Aruba Bank pa Koningin Wilhelmina Fonds (KWF).
Segun Lee, tur hende den nos comunidad ta wordo confronta cu cancer, pues Subway sigur kier yuda cu un bon donacion cu lo yuda KWF cu su tremendo trabaonan pa comunidad.
