Sublime tabata Lighting Parade di Carnaval 70

Esun di mas grandi di ultimo añanan:

ORANJESTAD (AAN) – E siman aki a habri unda cu den oficinanan, supermercado, den transporte publico y tur caminda por a scucha comentarionan hopi positivo di e Lighting Parade Oranjestad, e parada di mas grandi den e ultimo añanan, cu nos pueblo y bishitantenan a super gos’e!

   Enberdad por a mira hopi alegria den e gruponan participante, cuminzando pa TOB Carnival Groep cu tabata tabata enorme, parti den varios seccion. Esun prome tabata e “Milagronan di Africa”. Mas of menos ocho seccion interesante a participa cu un total cu a supera e cantidad di mil hende. Tur grupo a bisti trahenan super bunita y luhoso plama di cabes te pia cu luznan, bunita ritmo y sonrisanan na granel.

   E seccionnan cu no tabata presente, a keda pa engrandece ainda mas e parada den e siguiente fin di siman. Champagne Carnival Group tambe tabata inmenso, cu mil y pico participante y tambe a laga algun seccion atras, segun Linchi a splica, pa e paradanan final cu tambe lo ta di kita sombre. E dos gruponan aki a yena Vondellaan completamente. Empire Carnival Group tambe tabata tin casi 700 tremendo participante.

   E otro gruponan tabata Royal Carnival Group, Dushi Carnival Group, Los Laga Bay Carnival Group, OPC Carnival Group, y Colours Carnival Group cu den cantidad tabata chikito pero grandioso den talento, cu a bin cu e novedad di tin un D.J riba caminda, pa anima e ambiente ainda mas. Pues, nan tur tabata sublime! Ta bon pa destaca cu den su calidad di Minister di Cultura, señora Xiomara Maduro, a habri e Lighting Parade, di Aruba su Carnaval 70 cu hopi animo y emocion.

   Bunita ta cu entre e gruponan casi no tabata tin gaps; excelente pasobra esey a haci cu e carnavalistanan cant’ y caminda por a goza sin keda warda pa e parada por sigui. Hopi pabien na e organizadornan en general (SAC) y di cada Carnival Group en particular.