ORANJESTAD (AAN): Abigail Peterson ta un studiante di Universidad di Aruba (UA) kende hunto cu dos compañero di estudio a organiza un proyecto pa yuda Fundacion Contra Violencia Relacional (FCVR), cu antes tabata Fundacion pa Hende Muher den Dificultad.
Durante un conferencia di prensa Diahuebs Peterson a splica cu hunto cu su coleganan e ta organizando un evento pa cual nan ta pidi ayudo y sosten for di comunidad di Aruba.
Megan Thijsen tambe di UA a splica cu parti di nan proyecto ta un asina yama ‘Drive-By Donation’ unda cu tur articulo y placa colecta ta bay wordo uza na beneficio di FCVR.
“Boso tur ta invita pa bin Diasabra y Diadomingo awor di 9’or di mainta pa 2’or di atardi, unda cu nos lo spera di boso tur locual boso por aporta cune manera paña, cuminda, comestibles den bleki, cosnan di hunga etc.”, segun Thijsen.
El a bisa tambe cu e intencion ta pa aporta na concientizacion riba violencia relacional, mirando cu durante e pandemia sigur e casonan di abuso domestico a aumenta.
“Nos kier laga boso sa cu e fundacion aki tey pa cualkier hende cu ta den un momento di crisis, unda cu por yama tambe e number di e ‘Crisis Hotline’ cu ta 5671170”, segun e studiante di UA.
Esmay MacJannet tambe ta parti di e proyecto y el a splica cu e evento ta bay tuma lugar riba e parkinglot di Universidad.
El a enfatiza cu hende por contribui cu cualkier articulo, unda cu cosnan chikito mes manera pasta di diente, un bleki di tuna etc. ta wordo aprecia.
Esun cu por trece algo chikito por trece esaki y esun cu por contribui cu un tiki mas tambe por haci esaki.
E studiante a splica cu e evento aki sigur ta pa un bon causa cu ta uno importante pa nos comunidad. DIARIO ta pensa cu si acaso a organiza esaki e siguiente weekend, lo por a haya mas hende ta yuda. Pasobra ta solamente ambtenaar a cobra nan salario caba. Resto di Aruba ta cobra te fin di luna.
