Studiantenan di EPB Oranjestad a bay haya sa mas con Meteo Curaçao ta funciona

ORANJESTAD (AAN): Manera cu DIARIO a trece dilanti caba, den luna di December 2024,

e scol EPB Oranjestad situa na Hato, a bay cu 12 alumno Curacao pa un studie trip tocante agricultura.

   Despues cu Aruba a comparti cu Curacao e conocimento di agricultura na Aruba, nos studiantenan haya e oportunidad pa conoce e mundo di agricultura na Curacao. Ariba combinacion di potret por mira e prome dia di yegada na Curacao.

   Tambe e alumnonan di EPB Oranjestad a haci algo diferente den e intercambio di conocemento di agricultura, proyecto di Erasmus+ tabata tin deseo pa bishita Departamento Meteorologico.  Esaki ta situa na Seru Mahuma cerca di Aeropuerto.

   Aki nos alumnonan a haya un splicacion amplio con Meteo na Curacao ta traha, con sistemanan tradicional tabata pa midi cantidad di yobida, con ta usa aparatonan instala na lugarnan remoto, y tambe e famoso radar di awacero di Curaçao cu hopi hende na Aruba conoce.

   Tambe a mira e parti interior di Meteo Curaçao, unda nan tin nan mesun studio pa bay live na TV den caso cu tin maltempo.  Tambe a papia di e clima actual, di e observacionnan di cambio, y demas detayenan con agricultornan por beneficia di e conocemento di Meteo.