Studiantenan di Aruba ta logra reconocemento maximo na e ‘52nd National High School Model United Nations Conference’ na New York

Dirigi pa Delegacion di ARUMUN

ORANJESTAD (AAN):   Studiantenan di tur parti di Aruba, reuni bou di ARUMUN, a logra resultadonan sobresaliente na e 52nd Annual ‘National High School Model United Nations (NHSMUN) Conference’ na New York City. Organisa localmente pa Tenn Group, e delegacion ARUMUN tabata inclui studiantenan di varios scol riba e isla, entre nan International School of Aruba (ISA), y De Schakel College.

NHSMUN ta reconoci ampliamente como uno di e conferencianan di Model United Nations mas grandi y prestigioso pa studiantenan di scol secundario na mundo, reuniendo miles di studiantenan di decena di pais pa debati asuntonan global y simula diplomacia internacional.

E aña aki ta marca e cuater aña consecutivo cu ARUMUN ta participa na NHSMUN, siguiendo fortalece presencia academico di Aruba riba escenario internacional. 

Logronan di e delegacion

E delegacion ARUMUN tabata tin un resultado colectivo excepcional durante henter e conferencia y a ricibi dos premio importante pa delegacion completo:

Excellence in Research and Preparation Award, reconociendo e investigacion academico sobresaliente y preparacion di e delegacion prome cu e conferencia.

Excellence in Overall Performance Award, reconociendo e diplomacia, colaboracion y efectividad excepcional durante e sesionnan di comite.

E premio nan aki ta reconoci e dedicacion di henter e team y ta refleha lunanan di preparacion den investigacion di politica, negociacion, oratoria y trabou den equipo.

Distincionnan individual

Ademas di e premio nan pa delegacion, varios studiante tambe a ricibi reconocemento individual pa nan desempeno excepcional.

Juan Rodriguez a ricibi un Distinction Award den e Organization of American States (OAS), reconociendo e delegado cu mihor resultado den su comite como tambe a ricibi invitacion di conoce e ex - Vice-Presidente Sra. Kamala Harris.

Ademas, tres studiante di ARUMUN a ser selecciona como Committee Rapporteurs, un rol prestigioso unda delegadonan ta representa nan comite y ta presenta remarcanan durante e ceremonia di clausura dilanti di henter e conferencia. Rapporteurs ta wordo selecciona entre e delegadonan mas comprometi y efectivo den cada comite.

Miembronan di delegacion y comiteenan

Argentina
• Juan Rodriguez — OAS
• Matthias Helder — CND
• Damian Leong — CND
• Felipe Gonzalez — CPD
• Misha Boset — CPD

India
• Neyah Keam — CSW
• Mia Ingribelli — CSW
• Ana Marcano — CMS
• Farah Morett — CMS
• Antoinette Kamermans — FAO
• Samantha Coupland — FAO

Formando lidernan global for di Aruba

A traves di ARUMUN, studiantenan di diferente scol na Aruba ta prepara durante henter aña pa desaroya habilidadnan den ‘public speaking’, diplomacia, negociacion, liderazgo y conciencia global. E programa ta reuni studiantenan di Aruba den competencianan academico internacional.

Despues di e exito di e delegacion di e aña aki, ARUMUN caba ta prepara pa su di cinco participacion consecutivo na NHSMUN, cu aplicacionnan pa e siguiente delegacion cu lo habri pronto.