Educacion na Colegio EPI
ORANJESTAD (AAN): Na Colegio EPI, e ‘Project ICT’ ta un modulo di segundo y tercer aña di e programa di educacion ‘Allround Medewerker IT Systems & Devices’.
E biaha aki, e studiantenan a haya e reto di participa na un compania ficticio, y nan tin di aplica den e proyecto aki tur nan conocemento- y habilidadnan cu nan a ricibi durante e lesnan di Linux, Windows, Network, MOS, Data, y Programming.
E studiantenan a cuminza cu skirbimento di un plan di proyecto, den cual nan ta describi ki recurso, tecnica, y strategia nan lo uza pa realiza nan proyecto.
Despues cu nan plan di proyecto wordo aproba, e alumnonan a realiza e proyecto bao supervision di e docentenan di e vak, unda habilidadnan tecnico, cooperacion, y capacidad di resolve problema ta poni central. E periodo a wordo conclui cu un presentacion y un rapport pa e team di docente, unda e studiantenan ta amplia cu detaye encuanto nan decisionnan, resultadonan, y proceso di siñamento.
Cada periodo, e rekesitonan di e proyecto ta bira mas exigente. Riba e potretnan aki pa cortesia di Colegio EPI, por mira con e studiantenan a presenta nan proyecto di Periodo 7.
