Studiante Whitney Gutierrez a entrevista Ministro pa por finaliza su tesis

ORANJESTAD (AAN): E studiante di Instituto Pedagogico Arubano (IPA), Whitney Gutierrez ta den etapa final di su estudio di Maestro di Enseñansa Primario na IPA. 

Den cuadro di esey, e ta haciendo un investigacion final pa su tesis. E topico di su tesis ta basa riba siñamento social emocional (social-emotional learning).

   Den cuadro di esaki, Whitney a entrevista Minister di Enseñansa Endy Croes pa yuda contesta su preguntanan di investigacion. Siñamento social emocional ta e proceso unda ta desaroya autoconsciencia, autocontrol y e habilidadnan interpersonal cu ta vital pa tin exito na scol, na trabao y den bida.

   Persona cu tin habilidad social emocional ta mas capaz di enfrenta e desafionan cotidiano y ta beneficia academica-, profesional- y socialmente. Pregunta principal di su tesis ta: Con un maestro of maestra por haci uzo di siñamento social emocional den klas pa yuda mucha homber cu no tin un figura paternal of tin e poco den nan bida y tin cierto actitud problematico of problema social?

   Minister Endy Croes a duna un splicacion bastante amplio di e vision di Gabinete Wever–Croes II encuanto siñamento social emocional y a señala algun proyecto cu a inicia caba relaciona cu siñamento social emocional. Minister Endy Croes ta contento di por a contribui na e investigacion y ta desea Whitney Gutierrez hopi exito cu su tesis.