Studiante local cu pasion mirando su proyecto ta birando realidad

Honor na Krish Alwani

ORANJESTAD (AAN): Ora cu un studiante ta haci algo grandi, sigur e merece di ricibi tur apoyo y aprecio.  Pesey recien International School of Aruba a reconoce nan studiante di examenklas, Krish Alwani pa e proyecto excepcional aki, cu ta refleha liderato, iniciativa, y un compromiso profundo cu comunidad.  Su trabao ta demostra con e pasion personal por transforma su mes den un impacto significante y duradero.

   E proyecto di cancha di Basketball a cuminza cu algo simpel:  Un lugar cu tabata importante p’e.  Creciendo na Aruba, e cancha local no tabata djis unda nan ta hunga Basketball, sino unda amistadnan a forma, e tabata pasa su weekendnan liber, y tabata siña di teamwork, disciplina, y comunidad.  E tabata hunga eynan cu tur su amigonan, famianan, y hasta docente, manera Meneer Ross, specialmente riba Diadomingonan mainta.  Sinembargo mientras tempo tabata pasa, e cancha a cuminza deteriora.  E piso a cuminza kraak, e liñanan a perde color, y e hoopnan cu a frustia no a bira atractivo pa hendenan keda hunga, y e tabata mira con esey ta socede y a pone bira desapunta.

   Asina e studiante Krish a bin na comienso cu un idea chikito.  E tabata kier pa e cancha bolbe wordo uza pa asina muchanan den bario por tin un lugar sigur, unda nan lo gusta bay pa hunga, mescos cu e tambe tabata sinti na comienzo.  Pero mas cu e tabata pensa riba dje, mas e ta ripara cu e lo por bira algo mas cu un simpel reparacion.  El a cuminza imagina un cancha renoba cu por uni comunidad, inspira e muchanan mas chikito y sirbi como algo duradero envez di ta algo temporal.

   Pa comberti e vision aki den realidad, tabata necesario pa trat’e como un berdadero proyecto, no djis un pasion.  El a investiga companianan di renobacion, el a crea un budget realistico, y a contact varios organizacion pa ricibi sosten.  El a asocia cu Infinity Courts Aruba y a traha cu compania- y hotelnan local, incluyendo The St. Regis Aruba Resort, pa por haya patrocinadornan.

   Pa recauda fondo, Krish a organiza rifa, a diseña materialnan di mercadeo, a promove e proyecto riba social media, y a coordina e sorteo di rifa cu premionan.  Cada paso a rekeri un planificacion cuidadoso, comunicacion, y perseverancia, specialmente ora cu e metanan di haya financiamento a cuminza sinti hopi pisa riba su schouder.

   Loke a cuminza como un conexion personal, a converti su mes den un iniciativa comunitario di gran escala.  E no tabata djis drechando un cancha, el a cuminza siña con pa lidera, busca sosten, y comberti un idea emocional un accion structura.

   “E proyecto aki a siñami cu un cambio significante no ta cuminza cu autoridad of recursonan... e ta cuminza cu e interes suficiente pa asumi responsabilidad, y logr’e tambe,” e studiante Krish Alwani a indica.

   E cancha aki ta situa pabao di caminda, net otro banda di The Butterfly Farm. Palabra di pabien na e studiante aki, no djis di International School of Aruba, sino felicitacion tambe di comunidad di Aruba, y tambe DIARIO.  Fenomenal empuhe y perseverancia.