Studiante di Aruba contribuyendo den ciencia farmaceutico pa futuro pildonan 3D

Ex-alumno di Dominicus College y Colegio Arubano

ORANJESTAD (AAN): Riba e potret aki por mira Javier Estefanus Maduro, Ing. Biologie en Medisch Laboratorium Onderzoek y MSc Farmacie.  Por mire banda di e machine cu ta creando pildonan 3D.

    Javier a core stage na diferente laboratorio, botica na Hulanda y Hospitaal na Aruba y tambe na Hulanda. Un di e stage nan aki tabata na Erasmus Medisch centrum. Akinan el a cay bao di guia di Sejad Ayyoubi, un PhD kandidaat, kende ta haciendo su investigacion den e tema di traha pildonan di hydrocortison den e forma di 3D printing cu e meta pa por print tabletnan na diferente dosis cu no tin riba e mercado actual.

   Durante e periode di stage, el a haci un bon papel cu el a worde ofreci un side-job pa yuda riba e proyecto y yuda guia e siguiente stagiairenan cu lo sigui riba e proyecto.

   Ora el a termina cu su Master of science (MSc) di Farmacie, el a worde ofreci un contract pa sigui traha na Erasmus MC y sigui cu e desaroyo di e pildonan. Akinan e tabatin e funcion di desaroya e ‘inkt’ y uza e ‘inkt’ aki pa por print e tablet y tambe analysa e tabletnan pa wak si nan ta conforme cu e reglanan stipula door di e Farmakopea Europeo (esaki ta un obra di referencia legal y cientifico cu ta pone e normanan y calidad pa e remedenan y nan ingredientenan na Europa).

   E tareanan aki e mester a haci hunto y pa e candidatonan di PhD cu tambe ta forma parti den e 3D team. Banda di e tareanan aki, el a sigui guia e stagiairenan nobo cu tambe a bin haci nan stage eynan.

   Despues di un periodo cu a cuminsa cu su stage na september 2023, na april 2025 a yega ora pa despedida di Erasmus MC y actualmente Javier ta bezig cu su siguiente aventura den e forma di un boticario na Botica Benu Jan Heijns na Tilburg. Eynan e ta bay haci e trayecto di specialisacion pa bira un Openbaar Apotheker. Maske cu el a laga Erasmus MC atras, pa su trabao den e desaroyo di e pildonan, el a worde inclui den e lista di autor di e articulo di meneer Sejad Ayyoubi.

   E articulo aki ta bay worde publica den e European Journal of Pharmaceutical Sciences y por worde lesa via e website:

www.bit.ly/3dpildo

   Palabra di pabien na Javier Maduro y tambe su famia cu e fenomenal logro aki.  Esaki sigur ta haci tur Arubiano orguyoso di e yiu di tera aki y cu su logronan na Hulanda.

   Riba e potret por mire para banda di e machine trahando pildo 3D.