ORANJESTAD (AAN): E lucha y oido pa e trabou di nos maestronan wordo respeta mas, ta uno cu a cuminsa decadanan pasa.
Cu hopi pasenshi nan a warda, forma ‘werkgroepen’ pa brinda Gobierno sosten pa aporta na e realisacion di e “functiehuis, nan a hasta welga na formanan responsabel, pa locual ta nan derecho, pero te dia di awe, no por mira resultado.
Ser educador den e temponan dificil aki, no ta un tarea facil. Costo di bida a subi durante e añanan, y ta solamente husto pa e salario di e actor, cu ta aporta na formacion di tur nos otro profesion nan den comunidad, tambe subi debidamente, pa asina garantisa cu e docente ta wordo compensa pa su dedicacion.
Un di e retonan mas grandi ta, e vaste dienst di nos maestronan. Tin maestro cu tin mas cu 10 aña eherciendo e funcion, cu ainda NO por logra haya nan vaste Dienst.
Esaki sigur ta trece complicacion pa esnan den e situacion, sigur ora di realisa metanan den bida diario p.e. un prestamo pa hipoteca of pa cumpra auto. E ehempelnan aki menciona, no ta posibel pa un maestro cu NO tin su vaste dienst.
E punto den e Plan di Gobernacion:
‘Revisa e structura salarial di docentenan y bin cu un sistema di compensacion cu lo laga e docente sigui crece salarialmente y duna compensacion cu ta incentiva e docente pa sigui studia y inverti den su conocemento practico y pedagogico.
A trece e dos puntonan specifico aki dilanti, cerca e minister concerni, pa haya atencion y pa percura pa e situacion aki por haya solucion mas pronto posibel.
Esaki sigur lo trece un alivio grandi y lo kita e presion innecesario di nos maestronan.
Un maestro mester por traha cu paz y trankilidad, pa nan por eherce nan trabou debidamente y disfruta haciendo esaki, pasobra esaki ta locual ta wordo spera di nan. Pues, ta e deber di Gobierno, nan dunador di trabou, pa percura pa un salario husto y un compensacion debido pa nan. Y como parlamentario, representante di pueblo, ta mi deber pa keda vigila esaki pa e wordo cumpli.
Otami Thomasia
