ORANJESTAD (AAN) – Director di Departamento di Asuntonan Social, señora Glenda Hernandez, a sigui duna su relato di actualizacion relaciona cu e Social Crisis
Plan, elaborando ainda, riba e tema di puntonan di riesgo cu mester di atencion, cu por a lesa den un prome articulo.
Prevencion y apoyo parental: Hernandez a señala cu como mayor, nos no a haya un estudio con pa lanta y cria un mucha. “No tin un opleiding cu mi conoce na mundo of na Aruba, cu ta siña un mayor con e tin pa couch un mucha of zorg pa e sinti su mes bon y tin bienestar”.
Dentro di e Social Crisis Plan esey ta tumando lugar, den e Centro pa Hoben y Famia, unda for di aña pasa cu e centro aki a habri, nan ta dunando e capacitacion na mayornan. Mayornan ta worde acerca pa nan bin na e Centro y pidi sosten. E centro tin diferente servicio di diferente instancia bao un dak y nan ta haya e guia rekeri.
“E ta yuda masha hopi mes pa duna orientacion pa mayor kico nan por haci si ta confronta cierto problema, den e crianza di nan yiu”, Hernandez a bisa.
Stress pa falta di entrada economico (Income economic stress): Esaki, e director di DAS a bisa, tambe ta un factor di riesgo hopi grandi. Actualmente, tin hopi problema social, economico, y psicologico a causa di e pandemia cu ta trece tambe su incertidumbre pa un famia cu ta den stress pasobra no tin suficiente entrada. “Nos a mira recientemente, un caso lamentable unda un mama bao di hopi stress a basha sopi cayente riba e mucha. Esakinan, desafortunadamente, ta cosnan cu por spera, unda mucha chikito ta sufri na consecuencia di esaki” el a señala.
Mester wak, como gobierno, con ta yuda mama soltero, famianan cu ta vulnerable, si nan tin un opleiding pero a keda sin trabao, mester yuda nan con pa yega na un trabao. Riba e aspecto aki tambe tin diferente proyecto cu a, y lo worde entama.
Servicionan di respuesta y sosten: (Response & Support Services): Hernandez a splica cu esaki tin di haber cu ora un hoben ta victima di un inhusticia, por ehemplo si el a worde maltrata, ki acogida e ta haya; si e mes tin cu bay hospital, si e mes tin cu conta su mesun historia, bay Polis, Oficina di Husticia, of hasta bay psicologo.
Den e cambio cu ta bay bin, ora e mucha ta papia, un solo bez e ta hacie. Tur e profesionalnan di e instancianan envolvi tur ta bay scucha e combersacion cu YZP ta bay tin cu e mucha, ken no tin cu cada bez conta su mes historia.
Habilidadnan educativo pa bida (Educational & Life Skills): Esaki ta hopi importante pa un mucha ta resiliente. “Esey ta hopi importante pasobra den bida bo ta wak cu e hendenan mas exitoso ta esnan cu ta resiliente. Bida nunca ta bay manera bo kier, y e ora ey con bo por cuminza atrobe? Tin cosnan cu bo no a logra, pero kico bo ta haci pa bo lanta back y sigui bo caminda pa bo haya toch exito?” Glenda Henriquez a indica.
