ORANJESTAD (AAN) – Matutino DIARIO a entrevista Meester doctor Jayburtt Dijkhoff, ken ta naci na Aruba dia 9 di Juni 1987, y cu diamars 20 di April a
gradua pa su PhD na Universiteit Utrecht, defendiendo su Tesis riba e tereno di “Gezondheidsrecht”.
Na principio esaki mester a tuma lugar na Hulanda, pero pa motibo di e pandemia y lockdowns e defensa di su tesis mester a wordo haci online, na Universidad di Aruba.
E tema di su investigacion ta “Regulacion di e calidad di cuido: e derecho riba calidad di cuido na Aruba.
Meester dr. Dijkhoff a menciona cu e estudio aki ta hopi importante pasobra e ta e prome disertacion den region Caribe, cu ta haci un comparacion entre e leynan di salud, den e caso aki di Aruba, cu e leynan di Hulanda.
“Asina e investigacion aki ta yuda gobierno y pueblo di Aruba, con pa sigui mehora e calidad di cuido a base di e resultadonan di e investigacion profundo aki”, mr. dr. Dijkhoff a indica.
Hopi perseverancia, esfuerzo y entrega:
Mr. dr. Dijkhoff sigur ta un inspiracion pa otro hobennan cu kier logra un profesion y progresa den bida, a base di perseverancia, esfuerzo y entrega pa logra e meta.
“Desde scol basico mi a experiencia dificultad cu e idioma Hulandes, como cu e no ta e idioma cu mi ta papia na cas. Despues mi a sigui mi estudionan na Colegio Arubano unda mi a sigui cu e dificultad ey, pero mi a persisti. Na momento cu mi a cuminza studia Derecho na Universidad di Aruba, esaki a bira bisto atrobe, mirando cu e idioma den Ley ta mucho mas complica y dificil compara cu e idioma coriente y den e seno familiar. Asina mes, mi a logra di caba mi estudio di Derecho y mi a bira Meester in de Rechten na 2010. Despues di a cuminza traha, entre otro, na DVG na 2012, mi a haya un bista con nos leynan ta wordo aplica den practica, y a haya experiencia tambe di e leynan di salud publico. Na 2015 mi a haya oportunidad di cuminza cu un trayecto di promocion pa logra e titulo di Doctor den Ley. Awor, cu mi a completa esaki, mi por wak bek cu mi mester a bolbe siña Hulandes riba un nivel mas halto, y mi ta spera cu esaki por sirbi como inspiracion pa otronan, especialmente pa e hecho cu e ta posibel na Aruba mes pa nos studia y logra un titulo. Mi a haci’e via Universidad di Utrecht, pero mi mester gradici tambe Universidad di Aruba pa a brinda mi e plataforma necesario pa mi por a cuminsa y finalisa e estudio aki”, mr. dr. Jayburtt Dijkhoff a expresa.
Pakico a scoge e tema aki?
“Mi a scoge e tema aki mas tanto pa mi duna un aporte na pais Aruba, for di e perspectiva con nos por sigui mehora e calidad di cuido. Nos no mester conforma na e situacion actual, pasobra semper tin caminda pa mehora. Hopi a wordo haci caba y e resultadonan di e investigacion aki ta mustra e ruta cu pais Aruba por tuma, pa por yega na un sistema di calidad cu mehoracion continuo. Tin varios punto cu mi a menciona y mi a bin cu diferente recomendacion, pero e punto mas central ta cu Aruba mester introduci un sistema nobo y integral pa regula calidad di cuido. Y nos por. Tin hopi recurso disponible y ta un cuestion di coordina y trece esakinan hunto bao di un vision pa calidad di cuido pa awo y futuro”, mr.dr. Dijkhoff a señala.
Kico ta calidad di cuido?
“No tin un definicion internacional kico ta calidad di cuido. Ni Hulanda ni Aruba a logra defini kico calidad ta. Pa e motibo ey e leynan tocante cuido no ta defini kico ta e exigencianan pa cuido, sino kico ta e exigencianan di responsabilidad minimo cu esnan cu ta traha den cuido mester cumpli cu n’e”, mr.dr. Dijkhoff a splica.
Na unda calidad di cuido ta faya?
“ E calidad di cuido ta faya na por lo menos cinco nivel. Meester dr. Dijkhoff ta describi e siguiente puntonan:
- E nivel di formacion y educacion continuo no ta garantiza, ainda, aki na Aruba.
- Siguientemente e control di e tribunal disciplinario di medicina (Medisch tuchtcollege) no ta funciona manera mester ta.
- Tambe e auto-regulacion den cuido no ta suficiente elabora na Aruba, den comparacion cu Hulanda.
- Ta regarda hopi incertidumbre con ta organiza e cuido den instancianan.
- Por ultimo, e financiamento di cuido, no ta stimula e miho calidad”, mr. dr. Jayburtt Dijkhoff ta indica.
