ORANJESTAD (AAN): Por a sinti esaki caba den fin di siman, y e tabata mas fuerte cu antes. E stof fini di Sahara ta plamando un biaha mas riba paisnan den Caribe,
pero e biaha aki e no a bin su so. E ta bin cu particulanan di SO2 (dioxido di sulfur), cu ta bin di e vulcan di Cumbre Vieja na e Isla La Palma na Spaña.
Esey ta loke meteorologonan ta confirmando, cu a bisa cu semper despues cu un yobida fuerte pasa, su tras ta bin stof di Sahara, aunke ya pa October esaki ta bay cuminza disminui na forma significativo. Pero ademas di e stof di Sahara, esaki ta treciendo tambe SO2 (dioxido di sulfur), cu ta bin di e volcan activo di Isla La Palma na Spaña.
Pa evita cualkier menaza cu e particulanan aki di Sulfur y e stof di Sahara por tin riba e curpa humano, lo ta consehable pa keda usa un bon tapaboca pa proteha bo pulmon.
Ya caba bo tin di usa e tapaboca pa mitiga e brote di Coronavirus, wel awor bo tin mas motibo pa cana cune bisti ora cu bo ta pafo.
E grafico aki ta mustra con riba Diadomingo pa Dialuna, e particulanan di SO2 ta wordo detecta pa satelite, y ta mustra cu den area di Republica Dominicana, Puerto Rico, y Haiti, e ta di 89 Micron pa cada Meter cubico.
E concentracionnan no ta bisa cu e ta pasa riba e limite di calidad di aire, pero manera a wordo skirbi caba, mihor como prevencion bo ta pone bo tapaboca, specialmente hendenan cu tin malesa cronico cu hala rosea.
