Wikileaks, Panama Papers y Pandora ta exigi un pregunta - E tata di famia cu a dera placa antes tambe tabata un criminal? - Unda abuso di periodista of investigador ta cuminsa y caba?
ORANJESTAD(AAN)- Pa un persona tabata un honor di wordo invita dor di Department of State di Merca, pa bishita e pais. E ta uno di e hopi personanan rond mundo cu pa nan bon conducta y como reconocimento ta ricibi un invitacion di un gobierno di un pais extranhero.
Pa motibonan di seguridad, segun reglanan di un pais, preparacion di acontecementonan, e mester entrega informacion di su persona na Departamentonan di Gobierno Mericano.
Informacion sumamente personal cu na Aruba Huez no ta permiti ni politiconan haya den registro di eleccion, ta wordo presenta na Gobierno Mericano, cu ta haci invitacion na hende pa occasion special, pa biahenan di orientacion, entre otro.
Diripiente un persona ta dicidi cu el a haya e forma pa penetra den informacionnan oficial di e pais, cu segun su persona, democracia ta haci cu e mester por drenta.
E ta penetra den documentonan cu personanan cu a hura cu nan no ta divulga informacion di hende y ta dicidi di publica e informacionnan aki.
Wikileaks a wordo aplaudi. Organisacionnan a lanta para pasobra Husticia a bay contra un ladron di informacion oficial personal. Atrobe bandera di democracia mester a cubri loke ta intolerabel na un mundo liber.
Te awe Wikileaks ta haci cu cualkier persona por subi internet y habri tur informacion di personanan cu tabata tin contacto cu State Department.
Nan nomber, direccion, tur informacion a wordo publica pa un plataforma mundial pa un suspuesto investigador, por a bira famoso.
Den pasado hende tabata dera placa den cura. Na Aruba, rond mundo, tabata tin hende cu ta opta pa no hiba nan placa banco local pero perde interes cu nan por a ricibi, pa nan fortuna keda desconoci pa tur hende.
Nan no a comete ningun crimen, pero simplemente a dicidi cu nan no kier habri un cuenta di banco y revela cu nan tin placa cu nan a haya cu sudor di nan frente y riba cual nan a paga belasting, warda.
Cantidad di persona a dicidi cu nan kier inverti den exterior. Hopi hende a cumpra time share, cu ta conoci na Aruba tambe.
Otro a cumpra na Merca, na Hawaii of cumpra cas of un otro propiedad cu nan placa.
Tin hende tin un cuenta di banco pafor di nan pais of ta habri un negoshi pafor di nan pais.
Nan ta uza placa cu nan a gana legalmente, inverti den exterior despues di a paga belasting na Aruba, caminda prome cu un trahador paga ricibi su sueldo, ya a kita placa di belasting.
Cu tin un grupo cu timn cos di sconde, tur hende mester sa. Pero esaki ta den tur cos y hopi bez cerca hende cu menos a wordo spera.
Aruba a bira un centro financiero mundial den pasado pa motibo di personanan cu kier a inverti offshore. Hendenan cu tabata kier a probecha di paga belasting mas abou na Aruba.
Offshore a sufri ora Merca y otro paisnan a defende nan mes y a kibra cierto tratado.
Awe Pandora ta noticia y atrobe cantidad di nomber ta wordo menciona sin prueba cu e personanan aki a comete un acto castigabel na nan pais.
Con e informacionnan personal por a subi mesa? Kico lo pasa cu hende, si e no por haci cu su propiedad loke e kier, mientras e cumpli cu Ley?
Pakico ta permiti Bitcoin y otro moneda “crypto” (scondi)?
Te na unda hende tin libertad ainda pa haci loke e kier cu fruta di su trabou, si e keda den cuadro di ley?
Periodismo y investigacion cientifico no por wordo uza pa destrui libertad di hende.
Libertad personal a muri, pasobra un persona cu a drenta un panaderia pa cumpra un pan por sali den publicidad pasobra a deshaci di leynan di privacidad di uzo di portret di hende pa publica su persona ta cumpra pan.
Number di auto di hende ta bira conoci. Loke mester ta secreto di trabou di Polis, a bira informacion publico.
Un fiesta por spart un famia for di otro ora publica portretnan di hende cu tabata presente na un fiesta priva.
Tristo ta, cu criminalnan grandi ta keda scondi. Interpol por splica cuanto ta tarda pa por resolve casonan di criminalnan cu ta scapa di publicidad.
Mester persigui tur hende cu ta actua contra ley. Pero no por bay habri depositonan di informacion secreto y personal, pa produci sensacion. Si tin prueba contra un hende, mester atende pa medio di autoridad segun leynan.
Gobierno mester ta transparente pero esaki no ta nifica cu mester publico registro di poblacion ni cu dokternan mester duna informacion personal.
Pandora a bira scandal mundial pa motibo di algun persona conoci. Den un tempo cu informacion mester scapa bida di hende, sensacion ta keda central.
