Stoelen dans extremo durante evento di Ladies of Harley

ORANJESTAD (AAN): Durante un atardi pa anochi alegre na Casibari Café, e fundacion di Aruba Harley Owners Group 297 a celebra e fin di nan exitoso “Ladies of Harley Bike Ride 2022”.

  Aruba HOG 297 a keda satisfecho cu e prome ‘Ride’ oficial di e fundacion aki, y nan lo converti esaki den un evento anual cu lo sigui tur aña riba e prome Diasabra di luna di Mei.

   E ride aki a bin di un dama pa organiza un paseo special pa damas. Esaki a cuminza Diasabra 7 pa 5:00 pm, saliendo for di Casibari Café, y a finaliza eynan tambe.

   Anochi ora nan a yega bek na Casibari Café, nan a tene wega.  Y uno di nan tabata e tan gusta baile di stul.  Seis participante femenino a cuminza baila rond di e stul, cu apoyo grandi di publico.  Poco-poco e participantenan a keda cay afo, te cu na final a resta dos participante so.

   Aki ta unda cu e competencia a bira hopi fuerte, y bailamento sensual a pone publico duna hopi aplauso. Y den e fiebre pa por bira e ganador, dado momento hasta e klapstul di palo a kibra y keda na werki.

   Na final, e dama cu a bira ganadora a bira Veronica Clement, y na di dos lugar a finaliza Magaly Curiel.