Miosotis Tromp di Tienda di Educacion:
ORANJESTAD (AAN)--Stichting Tienda di Educacion a cumpli 14 aña di existencia, dia 18 di Mei di e aña aki. Señora Miosotis Tromp, funcionario di e Fundacion, den entrevista cu Matutino DIARIO a expresa cu esaki ta un logro grandi, mirando cu nan a cuminza como un team hopi chikito cu a desaroya y poco, poco a bin ta creciendo, y actualmente ta dunando guia, conseho y sosten na henter comunidad di Aruba, tur mayor riba e area di crianza.
“Cumpliendo 14 aña ta duna nos e fortaleza pa sigui sostene e comunidad riba e area aki, unda nos ta mira diariamente cu e comunidad pa esaki ta creciendo, y con nos ta mira esaki ta pasobra nos ta hayando mas melding di mayor, pero tambe di instancianan cu ta traha hopi cerca cu nos”, Miosotis Tromp a señala.
El a agrega cu e Tienda di Educacion ta mira cambionan chikito di sosten chikito cu nan ta duna, cu tin impacto hopi biaha riba e bida di e muchanan, pero tambe riba e mayornan.
“Anto pa nos por sigui comunica cu nos comunidad, pero tambe extende e ayudo aki, nos ta bay organiza un conferencia en conexion cu nos 14 aña, pero tambe riba e Luna di Mei, caminda cu nos a celebra e Dia Internacional di Famianan”, Miosotis Tromp a indica.
E Conferencia su meta ta e importancia di balansa e rol cu un persona por tin diariamente. “Pensa riba e rol di persona individual, pero tambe como profesional y tambe como mayor.
