Suzy Maduro ta invita henter comunidad:
*Pa yuda cumpra material escolar pa alumnonan cu mester
ORANJESTAD (AAN)—Suzy Maduro, di Stichting Sociaal Fonds di Colegio Nigel Matthew, na San Nicolas, den entrevista cu DIARIO a splica kico ta e meta pa yuda e alumnonan di e scol cu material.
Maduro a splica cu dos aña pasa, dos docente di e scol cu ta casi pa baha cu pensioen, su persona y un trahado social a dicidi pa lanta un stichting, cual a tarda pasobra no ta asina facil pa wordo lanta.
Nan a dicidi di haci esaki pa yuda e alumnonan cu no ta economicamente asina bon situa, y cu tin ora nan tin falta di algun material. Aworaki, e tin dos aña caba y aña pasa nan a organiza un fundraising, masha great mes den un restaurant, y tin pensa di hacie e aña aki atrobe.
Te aworaki nan a yuda un total di 21 studiante, pero naturalmente tur cos ta keda anonimo. “Pero si, nos ta contento cu un scol na San Nicolas, por fin tin su fondo social, y nos ta pidi pa si tin hende interesa bin traha na e stichting nos lo aprecia esaki, y hasta kizas e por bira miembro di e directiva, pa por continua cu e trabao”, Suzy Maduro a señala.
E aña aki, Suzy a duna di conoce, a tuma full e restaurant pa dia 2 di December, y e ta completamente yen pa e Fondo Social di Colegio Nigel Matthew. “E ora ey nos ta bay haci e fundraising un tiki mas grandi, pa nos por yuda un tiki mas. En realidad, nos ta traha conhuntamente y hopi cerca di e trahado social di e scol, cu ta esun cu ta selecta e alumnonan cu mester di ayudo, e ta bay investiga con nan entrada ta, etc. Di nan propio esfuerzo, hopi biaha e famianan ta purba cubri e gasto pero si ya caba nan tin dos mucha na scol, e ta bira un tiki pisa”, Suzy Maduro a indica.
El a subraya cu nan no ta duna ningun hende placa, sino cu nan ta cumpra un of otro articulo escolar cu nan mester. “Nos ta hopi satisfecho y nos kier invita henter pueblo di Aruba pa participa den e fundraising of acerca nos. Nos ta riba facebook tambe, y nos por deliver e ticketnan”, Suzy Maduro a duna di conoce.
