ORANJESTAD (AAN) – Aldrich Croes, den representacion di Stichting Parkietenbos, a referi den conferencia di prensa, na su reunion cu Formador Evelyn Wever-Croes, den cuadro di formacion di Gobierno.
Na prome lugar Croes a gradici Formador señora Wever-Croes y na lider di Partido Raiz, como esun cu lo forma parti di e coalicion hunto cu Partido MEP, den e proximo gobierno, pa e invitacion.
Durante e audiencia e miembronan di e Stichting a haya oportunidad di trece dilanti e puntonan mas importante cu nan ta desea pa e gobierno nobo tene cuenta cune, pero tambe a pidi pa e puntonan aki bira parti di e acuerdo di gobernacion, pa nan bira puntonan cu por produci solucion pa e maneho di desperdicio di e dump di Parkietenbos y otro aspectonan di molester den e vecindarionan di Parkietenbos, Simeon Antonio, Mahuma, Wayaca, Buena Vista, etc., cu tur nan ta sufri.
“T’asina cu e molester den e barionan cu mi a menciona no ta solamente e dump di Parkietenbos, pero tin un lama y e aire tambe ta wordo contamina pa diferente factor. Entre otro, e antes Ser’i Tijshi, caminda tin desperdicio ta wordo dera. Nos por bisa cu e problema ey a wordo soluciona un aña y mey pasa mas of menos, door di hopi presion y trabaonan cu nos a haci hunto cu Serlimar, pa por a mitiga e situacion, y por fin e molester ey ta bao di control; no cu e ta soluciona completamente. Tin tambe e factor di WEB su huma cu ta molestia, durante hopi luna ora cu biento cambia. Pero fuera di esey, logicamente e dump di Parkietenbos cu a bira desproporcionalmente grandi. Un seroe cu ta un mahos bista, pero principalmente un molester y menaza pa e salud di e habitantenan.” Aldrich Croes a señala.
Croes a acentua cu nan a expone e puntonan hopi critico di e molester cu e habitantenan ta haya durante añanan, y cu ta violacionnan di tratadonan cu Aruba tin firma y cu ta parti di dje, y tambe derecho humano unda hende tin derecho pa biba y hala rosea den aire limpi y no contamina.
Aldrich Croes a reitera cu Formador Wever-Croes a scucha e miembronan di e Stichting bon, y tur otro miembro di Parlamento cu tabata den e reunion, y nan tin speranza.
“Nos a pidi tambe pa ta parti di e solucion y e ora ey palabranan di e Premier y demas miembronan presente tabata cu nan ta bay envolve nos y nos ta desea di ta envolvi. Ta mescos cu nos a soluciona e problema di Ser’i Tijshi, bon temporalmente soluciona y cu tin menos molester, nos ta desea pa contribui activamente e otro aspectonan cu ta molester pa e bario. Nos ta spera di e gobierno nobo un envolvimento mas proactivo y cu pronto nos por cuminza soluciona tur loke ta e molester, tanto e incinerator cu ta un di e puntonan cu nos a papia di dje, con cerca e ta di e barionan. Y ainda, tin mas cas cu lo wordo construi den e areanan di terenonan otorga. Dus, riba su mes tin hopi factor di molester cu ta wordo tolera of cu ta bin eynan cu ta demasiado cerca di e habitantenan, y esey ta un maneho cu no ta cuadra”, Aldrich Croes a remarca.
El a agrega cu e gobierno aki tin cu bay pone hopi atencion y bin cu solucionnan duradero cu tin cu duna resultado, cu e miles di habitantenan den e area aki lo haya un alivio grandi, ora e solucionnan aki drenta na vigor.
