ORANJESTAD (AAN): E siman aki, e organizacion di Æ Aruba Entertainment, a reuni cu Crisis Team relaciona cu algun cambio den medidanan pa purba mitiga brote di Coronavirus na Aruba.
Desde Mei 2021 cu e Decreto Ministerial a sali, tur cos ta igual na e momentonan aki.
Decision a cay cu awor, mag di tin tur tipo di entretenimento, basta cu no tin cobramento na porta caminda esaki por worde categorisa manera un concierto, pasobra esey tin stipula den e Decreto Ministerial.
Loke e nifica: Door di informa esey, pueblo por compronde mihor di e forma aki:
(*) Tanto D.J's, Bandanan Musical (sin preocupa con grandi of chikito e por ta) por sigui haci nan trabao sin ningun problema.
(*) Fiestanan na cas por worde organiza normalmente.
(*) Entertainment den Café's, Restaurant, Hotel etc, por tin sin ningun problema.
(*) Baliamento tambe por normal.
E unico restriccion ta cu na e momentonan aki ainda no ta ser permiti pa organiza fiestanan musical cu tin como solo meta di gana placa a base di evento musical den cualkier forma cobrando na porta, cual eventonan por ser categorisa como concierto.
Nan sa cu e ta confuso, pero esey ta lo ke ainda tin para den e Decreto Ministerial.
E bon ta cu e musiconan tin trabao ainda y tur mester yuda na mantene e situacion asina aki, te ora cu hasta e parti aki worde permiti.
