Stichting Musica ta trece Aruba Caiso & Soca Monarch den bario

ORANJESTAD (AAN): E siman aki a haya sa, cu e organizacion di Stichting Musica ta den pleno preparacion  trahando cu hopi entusiasmo riba nos Festival 2023.

   Durante reunion exitoso cu lidernan di bandanan, sponsornan y Smac, a palabra e cambionan cu ta worde introduci pa e siguiente temporada di Carnaval 69.

   Preparacionnan a cuminsa pa un tempo caba y Stichting Musica ta hopi satisfecho di por anuncia cu e Aruba Caiso & Soca Monarch lo cuminsa den luna di November cu e finalnan lo ta na fin di januari 2023. Un cambio cu lo tuma lugar ta cu Caiso  Soca lo drenta den nos barionan.

   Den luna di november respectivamente 12, 19 y 26 lo tuma luga e prefinalnan cu lo keda presenta den Centro di Bario Dakota, Centro di Bario Playa Pabao y Centro di Bario Brasil. Esaki ta encera cu nos musiconan ya caba ta preparando pa competi den e barionan den proximo luna di November, dunando amplio espacio pa cada produccion resona y biba den pueblo.

   Na januari 2023 lo continua cu e musica y e ambiente di Caiso y Soca finals. Aruba Caiso & Soca Monarch finals lo tuma luga diabierna 27 di januari y e gran competencia final di “Super Soca Saturday” lo ta diasabra 28 di januari, 2023.

   Nan ta sumamente entusiasma pa nan rueda di prensa oficial unda Stichting Musica lo informa tur e detayenan di Aruba Caiso & Soca Monarch.

   Cu esaki Stichting Musica ta informa pueblo tur desaroyo relata na e festival di mas grandi di Aruba.