Stichting Mantelzorg ta lantando pocopoco y ta spera cu pa augustus lo tin ubicacion y number di telefon

Rosa de Leon, presidente

ORANJESTAD (AAN) – Dia 24 di April 2025, Stichting Mantelzorg a wordo lanta, y su presidente señora Rosa Leon, a relata den entrevista cu Matutino DIARIO, cu e prome su prome stap ta percura pa un localidad, y e di dos sinta cu instancianan cu por yuda e fundacion.

            “Nos no tin un localidad na unda hendenan por yega na nos, y mi ta kere stap 1 por ta esaki. E di dos ta sinta cu diferente instancia pa conhuntamente, nan por crea un programa cu nan por ofrece.

Mi no ta un psicologo, mi mester di un persona cu lo ta willing pa duna e guia ey profesional, cu nos no tin, pa conhuntamente nos yuda e mantelzorgnan”, Rosa Leon a señala.

            Rosa Leon a bisa cu na Aruba no falta mas ley, pero si adapta nan na nos sistema local. “Nos mester tuma, nos no mester inventa algo cu tey caba, si nos por djis copi’e y adapt’e na nos sistema, na nos cultura, ta hopi importante. Y, importante ta siña adapta na e innovacionnan cu lo bin. Esey tambe ta algo cu nos falta hopi. Nos no ta gusta adapta, pasobra esey ta copia, pero nos no kier haci esaki. Pero pakico nos ta bay inventa algo cu t’ey caba, djis ban draai’e na nos cultura, y si e ta haci un mehoracion na nos, pakico no?” Rosa Leon a expresa.

            “E meta di esey ta si abo mes, como persona, ta reconoce si bo ta aporta of no na un mantelzorg y di con e importancia di e stichting, pa nos sinta papia, duna bo tips chikito, mi ta kere ta un cambio cu no ta haci den ‘un, dos, tres’, pero cuminza compronde kico e ta, kico ta e balor pa e persona cu bo ta dunando e guia, y mi ta kere cu poco, poco asina, nos por crea un balans entre loke abo ta duna y loke abo ta ricibi”, Rosa Leon a señala, agregando cu e ta kere cu ya pa augustus nan por duna mas informacion, por ehemplo, unda por comunica cu e fundacion, etc. Aworaki nan ta nobo, nobo, y pocopoco nan por bisa unda nan oficina ta y ki number di telefon tin.