Minister di Asunto Social y Husticia:
ORANJESTAD (AAN) – Minister di Asunto Social y Husticia, Rocco Tjon, a duna di conoce, den entrevista cu DIARIO, cu e lugar di Stichting Hunto na Dakota, ta bay habri na comienzo di otro aña y sigur lo keda cla den e prome cuartal, unda tambe lo duna atencion na adictonan ambulante.
E mandatario a indica cu eynan ta bay duna atencion na e adictonan ambulante. Ayanan lo por tin mas acceso y brinda mas cuido na, entre otro, personanan cu ta sufri di adiccion.
“Pero tambe ta hopi importante pa mi bisa un rato, cu ta bay tin renovacion den Centro Colorado, y eynan ta bay amplia e capacidad caminda mas adicto ambulante por haya cuido, y e trato necesario pa nan por rehabilita. Pues, esey tambe na comienzo di otro aña tambe lo keda cla, anto nos a amplia e capacidad mucho mas” e dignatario a subraya.
E dignatario a agrega cu banda di esey, obviamente, lo bay traha riba diferente metodo cu ta mas efectivo. Pero garantiza ta un palabra grandi, e minister a expresa, pasobra cientificamente ta proba cu un grupo chikito so ta rehabilita por completo.
“Pero esey no ta kita afo cu nos mester keda haci nos intento, pesey nos ta inverti den infrastructura, den e diferente metodonan di cuido cu ta wordo brinda aki door di nos personal tambe”, Minister Tjon a señala.
E mandatario a agrega cu den cuadro di seguridad publico gobierno ta bezig ta revisa cierto leynan, pa di e forma ey por actua mas facil, obviamente teniendo na cuenta e parti di subsidiaridad y proporcionalidad, pero e actividadnan ey tambe ta andando cu e vierlanden overleg.
E mandatario a bisa tambe cu e team di Stichting Hunto cu tin e team di bemoeizorg nan ta, literalmente, e funcionarionan cu ta riba caya cerca e adictonan ambulante, brinda nan e ayudo, un cuminda, un pan, un curso y ta hiba nan na e lugar unda nan por haya esaki, pero ora ta trata di infraccionnan cometi, segun nos Codigo Civil, Cuerpo Policial ta atende cu esaki.
