Minister Dangui Oduber
ORANJESTAD (AAN): Minister di Turismo y Salud Publico sr. Dangui Oduber a atende e lansamento di e videonan pa prevencion y concientisacion contra Cancer di Prostaat. Den clausura di luna di November ta dedica na e ser masculino y na e Fundacion Contra di Prostaat (FCCP) na Aruba.
Minister Dangui Oduber a hiba palabra ariba e importancia di prevencion y con cancer ta afecta un ser humano y nan famia y ta pone enfasis di e importancia pa haci chekeo anual y pa busca sosten y informacion na diferente fundacion manera; FCCP, Mary Joan Foundation, Stichting BOB Aruba, Wilhelmina Kankerfonds y tin hopi mas instancianan cu tey pa yuda nos comunidad.
E meta di FCCP ta pa concientisa e comunidad masculino y especialmente esnan cu ta riba 40 aña di edad, tambe nan ta comparti testimonio di pashentnan cu a sobrevivi di cancer y percura pa guia e ser masculino pa hasi nan chekeo medico anualmente.
Tur loke un persona mester sa di prostaat cancer na Aruba ta lo siguiente:
- Ta recomenda cuminsa hasi e PSA test ora tin 40 aña
- PSA test ta wordo haci na cualkier laboratorio y ta wordo haci via test di sanger y mester tin un resultado di menos cu 4.0
- 90% di persona cu tin cancer di prostaat ta curabel si e wordo detecta na tempo
- Den e top 3 tipo di cancer mas detecta di hende homber ta keda cancer di prostaat
- Anualmente, mas cu 200 persona masculino ta hasi test pa cancer di prostaat na Aruba
- Fundacion FCCP ta duna sosten emocional y concientisacion na e comunidad di Aruba
- Tratamento pa cancer di prostaat ta wordo haci na Aruba mes cu tecnologianan avansa
Finalmente, Minister Dangui Oduber ta gradici cada un di e miembronan di FCCP pa e trabou boluntario cu nan ta haci, nan ta yuda den e parti di concientisacion y duna sosten moral na esnan cu ta pasando den cancer di prostaat y nan famia.
“Na final di dia e meta ta pa baha e cifra di mortalidad y percura pa nos por scapa mas bida cu ta posibel”. – Minister Dangui Oduber
