ORANJESTAD (AAN)—Diaranzon 12 di October awo, Stichting BOB tabata di fiesta, celebrando cu el a wordo funda dia 12 di October 2012, kiermen diez aña pasa.
Diantha Nuesch, vocero di BOB, a expresa cu esaki ta danki na e trabao di hopi hende cu tabata envolvi pa por logra esaki, indicando cu BOB ta “bevolkingsonderzoek breast kanker” di Aruba, unda nan ta invita hendenan muher saludable entre 45 te cu 75 aña di edad, pa nan bin haci e chekeo preventivo di pecho, pa di e manera aki por detecta casonan cu por indica cancer di pecho hopi na tempo, y asina ey salba pecho y salba bida di nos hendenan muher.
El a subraya cu retonan tabata tin hopi pa por a set up un fundacion asina aki, of pa haci un sondeo di un grupo grandi di pueblo. Tabata tin hopi reto pa haya fondo, colaboracion, pero den e decada aki Fundacion BOB a yega hopi leu, y aworaki nan ta den un bon localidad y cu un team hopi profesional, unda nan por duna e servicio cu nos hendenan muher merece, y asina aki por yuda baha e cifranan di mortalidad, a causa di cancer na pecho hopi avanza.
Nan kier saca afo e damanan cu ta mustra señal di cancer na pecho basta trempan y asina continua cu e bunita trabao. Retonan tabata tin hopi y ainda lo tin den futuro, pero esaki ta algo cu ta laga BOB sigui crece, y cu hopi dedicacion ta sigui logra pa e futuro generacion tambe.
E iniciativa a surgi na momento cu hopi hende y specialistanan a uni cabes ora nan a ripara cu cancer na pecho e tempo ey, tur tabata hopi avanza.
Diantha a menciona cu cancer na pecho ta un malesa hopi fastioso pero si e persona ta na tempo, e por wordo cura. Cu deteccion na tempo por percura pa e tratamentonan ta menos invasive, menos largo, y por scapa e pecho y e bida. “Esey ta e bunita di e programa cu Stichting BOB ta ofrece, pa nos por tin un efecto riba calidad di bida di hendenan cu ta wordo detecta na tempo”, e dama a señala.
