Angelique Perez, Coordinador:
*E ta den proceso pa adapta e edificio
ORANJESTAD (AAN) – Angelique (Liki) Perez, Coordinador di Fundacion Sonrisa, y tambe di Fundacion Ambiente Nobo, a yama un conferencia di prensa den cual a duna informacion, tocante e caminata cu nan ta bay tin Diasabra awo, dia 26 di October, pa recauda fondo pa Ambiente Nobo.
Perez a splica cu Ambiente Nobo ta fundacion pa adulto mayor cu limitacion, cual tin actualmente 36 cliente activo, y algun hende riba lista di spera tambe.
E 36 clientenan activo ta presenta tur mainta, y nan ta clientenan di edad grandi cu ya caba tin gran necesidad di ayudo pa nan por bay baño, entre otro. P’esey tin e caminata pa recauda fondo pa por sigui duna e calidad di servicio pa nan.
“Tin hopi cos ainda cu nos falta pa adapta na e edificio, pero tambe pa duna nan e servicionan cu nan mester”, Liki Perez a reitera.
El a splica cu na 2018 Fundacion Sonrisa a wordo acerca pa nan tuma Ambiente Nobo over, anto e directiva di Sonrisa a drenta hunto cu Ambiente Nobo, y asina aki nan ta traha na bienestar di e clientenan.
“Mi tin cu bisa cu tur cliente, eigenlijk, cu bira grandi no por keda mas, nan so na cas. Y hopi di e clientenan grandi (adulto mayor) no t’ey mas tampoco. Esey ta pone cu famianan of rumannan cu tabata take care di nan, toch mester di un sosten pa nan por tin algo di haci cu nan. Hopi di e clientenan aki, nan famianan ta traha y p’esey nan ta bin cerca nos”, Liki Perez a menciona.
El a splica cu den e fundacion nan ta haci diferente actividadnan cu nan, entre otro social recreativo manera bay lama, etc., pa nan keda activo. Nan ta haci wega di mesa, y tur loke tin prepara pa nan den e programanan.
Liki Perez a menciona cu a base di loke nan tin in place, contando e personal, nan ta bay yena un sala, y nan ta buscando mas personal pa hiba e clientenan baño, y nan ta den proceso. P’esey nan a saca vacaturanan buscando mas hende pa yuda den esaki. Nan ta pidi hende cu tin estudio di Colegio EPI- nivel 4- Trahado Social, of Salubridad y Servicio.
Den articulo apart, Rafael Perez di IBiSA ta elabora tocante e caminata di Diasabra awo 26 di October 2024.
