Aruba ta enfrenta uno di e eleccionnan mas sushi den historia
- Manera DIARIO a adverti traicion di 1986 ta haya ripiticion na 2024
- Dia 5 di November placa di Pueblo lo wordo uza pa destrui Evelyn
ORANJESTAD (AAN) Bista di mundo na e momentonan ta dirigi ariba Aruba, cu durante ultimo añanan a haya tur atencion pa e logro grandi di Prome Ministro Wever-Croes cu for di 2017 a duna prueba na mundo, con por saca un pais for di desaster y crea un modelo di un pais bon goberna.
Pa basta dia DIARIO tabata papia di problemanan cu tabata wordo fabrica pa por yega na e momento cu ta destrui Evelyn Wever-Croes politicamente.
DIARIO a adverti cu Aruba ta yegando na e momento cu lo bira ripiticion di 1986, ora Betico Croes despues di a logra Status Aparte di Aruba, a wordo kita for di mapa electoral di Aruba, cu despues a dera e libertador di Aruba, Betico Croes, pa asina e opositornan di Status Aparte por a forma e prome Gobierno di e pais Aruba, cu tabata trabou di Betico Croes.
Awe en berdad historia ta ripiti den Gabinete Evelyn Wever-Croes, cu ta wordo forma dor di MEP cu den e crisis grandi di pandemia a bira e partido mas grandi di Aruba a base di e votonan di sosten di Pueblo di Aruba.
Ya cu MEP no a alcansa e mayoria absoluto e mester a forma un Gobierno cu RAIZ, cu no tabata parti di e prome Gobierno di Evelyn Wever-Croes, cu a saca Aruba for di e desastre financiero grandi cu Gobierno Mike Eman a laga atras.
Ora Raiz a haci su entrada den Gobierno Evelyn Wever-Croes, ya Gobierno Wever-Croes a logra un saldo positivo pa Aruba.
Tabata na 2020 cu ya Gabinete Wever-Croes a realiza e milagro di comberti un desastre financiero den un saldo positivo pa Aruba ora Covid-19 a bati na porta.
Si e situacion financiero di Aruba no a wordo coregi dor di e prome Gobierno di Aruba, e pais lo tabata den un desastre total.
Pueblo di Aruba a sostene e gobernacion di Prome Ministro Evelyn Wever-Croes cu a logra forma Gobierno Evelyn Wever-Croes 2, cu a sigui cu e trabou di e prome Gabinete dirigi pa Evelyn Wever-1.
Den esaki Raiz a haya oportunidad di participa. DIARIO semper tabata vigila loke tabata pasa teniendo cuenta cu informantenan di DIARIO ta den tur sector di Aruba y continuamente tabata pidi pa tene bon cuenta cu Raiz, cu a drenta Gobierno como rabo y complemento di Gobierno Wever-Croes.
Awe traicion ta bati na porta na momento cu Raiz kier yama un reunion hunto cu e actual oposicion den Parlamento pa yega na un mocion di desconfianza di Parlamento contra Evelyn Wever-Croes.
Manera DIARIO a wordo informa, Ministro Presidente Evelyn Wever-Croes no a wordo sorprendi dor di e accion di RAIZ cu a uni na e oposicion dirigi pa AVP cu sosten tambe di Benny Sevinger, cu Huez a condena na prison y cu RAIZ mes a bisa cu mester bay cas.
Pero awor Benny Sevinger hunto cu Raiz lo bay uza Parlamento pa mishi cu e bon nomber internacional di Prome Ministro Wever-Croes.
Manera por a comprende oposicion di cual awor Raiz ta parti kier baha tur Ministro di MEP sin ningun hustificacion, manera a pasa cu Endy Croes.
DIARIO a splica for di ayera un situacion serio a surgi den Parlamento cu sin hustificacion a dicidi cu Andy Croes mester bay cas.
No a busca prueba y no a busca berdad prome cu a dicidi esaki den e Parlamento cu si ta sostene e delincuente sentencia dor di Corte di Husticia pa prison.
Manera a bini dilanti e mocion di desconfianza lo ta basa riba redo sin ningun investigacion pero cu e solo proposito di baha Prome Ministro Evelyn Wever-Croes.
Pa Raiz y e otro miembronan di oposicion nobo, cu awor ta mayoria den Parlamento, loke ta importante ta bula cabez di Prome Ministro Evelyn Wever-Croes, cu segun tur informacion na e momentonan aki ta na caminda pa un victoria rotundo a base di loke el a logra pa Aruba den situacionnan hopi dificil.
Dia 5 di November lo tin e reunion pues cu a wordo yama dor di Marisol Tromp y Miguel Mansur den cual lo atende un rumor cu Prome Ministro Evelyn Wever-Croes lo a mete den investigacion di DIP cu no ta berdad.
Manera reglanan di gobernacion ta exigi, ora e investigacion a cera, Gobierno mester a puntra Ministerio Publico informacion pa e documentonan cu Gobierno mester tin pa un persona cu ta den servicio di Gobierno.
Esaki ta conta pa tur hende y ta parti di informacion cu Gobierno mester tin di ambtenaar.
Ora a pidi e dossier aki, segun regla, ya e caso a cera pues no por tabata tin metemento di Gobierno manera awor oposicion den cual Raiz y Benny Sevinger tambe ta presente, kier haci kere y kier uza pa trata na baha Prome Ministro Wever-Croes prome cu eleccion.
Na momento cu Gobierno a busca e informacion cu e mester tin di tur ambtenaar, ya investigacion a cera.
Por papia aki pues di un forma pa trata na mancha e bon nomber y reputacion di Prome Ministro Evelyn den Parlamento y asina haci uso di e placa cu Pueblo di Aruba ta paga Miembronan di Parlamento pa deshaci di e reputacion di Prome Ministro Wever-Croes.
DIARIO ta trahando riba e caso. Cu Prome Ministro Wever-Croes no ta mete den casonan di Ministerio Publico sigur ta bini dilanti den e forma cu el a atende cu e caso di Glenbert Croes y hasta ora su propio yiu a wordo confronta cu problema.
DIARIO sigur ta traha riba e situacion actual sigur den e hecho cu Prome Ministro Evelyn Wever-Croes no a duna su opinion den e forma cu un dia a pidi Marisol Lopez-Tromp pa bay atende cu un denuncia den su contra mientras den caso di Glenbert Croes el a wordo deteni na forma rigido.
DIARIO ta sigui traha riba e plannan cu actualmente ta wordo fabrica dor di Oposicion pa deshaci di e logronan di Evelyn Wever-Croes prome cu eleccion cu lo bira un victoria aplastante pa su persona segun tur informacion te awor.
