Stichting Ambiente Feliz a ricibi un suma parcial di e projectsubsidie pa e proyecto Cas Briyante

Cu esaki por cubri e gastonan di salario y exploitatie te fin di juli

ORANJESTAD (AAN): Directiva di Ambiente Feliz a confirma Diabierna cu a ricibi den oranan di mainta un suma parcial di e projectsubsidie di locual a wordo acorda caba pa e proyecto Cas Briyante na San Nicolaas. Cu e suma aki e fundacion por cubri e gastonan di salario y exploitatie te fin di juli.

            E futuro di e localidad Cas Briyante ainda no ta sigur mientras cu no tin claridad ki dia Land Aruba lo cumpli cu e resto di e subsidio. Si e fundacion no ricibi e suma necesario pa por cubri e gastonan di augustus te cu fin december 2023, e fundacion lo ta obliga pa cera e portanan di su localidad fin di juli y manda no solamente su empleadonan pero tambe e clientenan cu ta depende di cuido profesional na cas.

            Directiva a manda desde september 2022 varios carta pa entre otro Minister di Husticia y Asunto Social y Departamento di Asunto Social indicando cu no a cumpli cu e subsidio pa e proyecto pa aña 2023. Directiva nunca a ricibi un contesta.

            E fundacion ta spera cu awor si Land Aruba lo ta mas transparente den e proceso di subsidio y lo por informa e fundacion debidamente den un tempo cortico ki dia e fundacion lo ricibi e otro parti di e proyectsubsidie.

            Stichting Ambiente Feliz, un fundacion funda na october 1986, ta brinda servicio residencial na persona cu limitacion intelectual of multiple. Na september 2021, cu fondo di Sociaal Crisisplan, e fundacion a habri nan porta di nan localidad yama Cas Briyante na San Nicolas.

            E localidad situa na Palisiaweg ta ofrece cuido intensivo na persona cu tin 6 aña of mas cu un limitacion multiple. E clientenan ta depende completamente di e cuido di nos guianan profesional cu ta traha hunto cu otro specialista di otro fundacion pa mehora e bienestar y desaroyo di e clientenan.