Status Aparte di Aruba no tabata solamente separacion estatal
- E evolacion propio di Aruba a haya reconocemento legal
- Historia legitimo di Aruba ta base di idioma, moral y cultura
ORANJESTAD(AAN)- “Status Aparte no tabata un lucha naci for di un pensamento politico. E ta mara na e evolucion di Aruba atrabez di historia.”
DIARIO a expone tur e cartanan presente den e desaroyonan cu a presenta for di e momento cu Betico Croes a presenta un concepto nobo y un plan total pa reformacion estatal di Aruba, na expertonan cu a duna informacion importante.
“Aruba semper kier a para riba su propio pia a base di e influencia colonial cu a centralisa poder na e islanan Hulandes den Caribe, na Curacao cu a bira e centro di decision,” ta bini dilanti.
E lucha di e Arubiano pa separacion a perde su peso na momento cu e enfasis wordo pone riba e creacion di un economia nobo pa Aruba.
“Entrada di Lago tabata sumamente importante pa Aruba. Pero economia mundial durante añanan cu a sigui despues di Guera Mundial, a conoce cambio y ampliacion. Un epoca di oro a produci su mes pa mundo,” ta bini dilanti.
Economia di Aruba a haya un empuhe grandi sigur despues di e Interim Regeling, den cual e deseo di Aruba pa separacion a wordo aplasta pa cambio den Parlamento Antiano, caminda Aruba a perde su posicion igual cu Curacao, a base di e representacion di 12-8 den Parlamento cu mester a refleha e tamaño di poblacion di e islanan pero no e sentimento y e aspectonan cultural y historico di cada isla riba su mes.
“Idioma ta sigur e ehempel grandi den e diferencia cultural di e poblacion. Si Papiamento nunca prome a haya su reconocimento como idioma, ta pasobra no a acepta e diferencia entre e Papiamento cu ta wordo papia na Curacao y Bonaire y e Papiamento di Aruba,” ta bini dilanti.
Ta wordo referi na e papel importante cu ciudadanonan manera Jossy Mansur a hunga pa defende Papiamento como herment cultural di Aruba.
E diccionarionan di Jossy Mansur, e lucha cu a wordo hiba pa mantene e ortografia etimologico cu ta oficialisa e herencia cultural di Aruba, a hunga un papel crucial.
Nunca por a soluciona e problema di idioma di e islanan si no a dicidi cu Curacao y Bonaire tin Papiamentu como idioma y Aruba Papiamento como su idioma.
E cultura di e paisnan, e costumbernan di e islanan ta diferente debi na nan historia diferente cu ta marca nan poblacion, expertonan ta trece dilanti.
Manera nan a trece dilanti, tabata tin un union estatal falso cu no tabata permiti e desaroyo total di e Pueblonan di e islanan, cu awe ta coopera cu otro riba tur tereno, manera Betico Croes a pronostica for di momento cu el a inicia e lucha pa Status Aparte.
Den e Himno y Bandera di Aruba ta reconoce e caracter, e historio y e cultura propio di Aruba cu ta base mas importante pa un nacion.
E Himno y Bandera di Aruba tabata e forma oficial pa yega na e aceptacion oficial di e diferencia entre e asuntonan basico di e Pueblonan di e diferente islanan di Reino Hulandes den Caribe, expertonan ta indica.
Den e lucha pa Status Aparte, bon comunicacion tabata necesario. Papiamento, e cu a forma su mes den e historia di Aruba, a bira e idioma di e Pueblo di Aruba.
“Arubianonan a uni den un lucha cu tabata di tur Arubiano. E Himno “Aruba Dushi Tera” ta carga cu emocion di e Arubiano y hasta tin Waltz y no un marcha militar como su base.
Padu Lampe y Rufo Wever ta drenta historia como Arubianonan cu a produci e musica y texto di nan Himno Nacional.
E bandera di Aruba ta entrega Aruba e seyo di un Pueblo cu no a acepta e bandera Antiano como su bandera, cu ta representa e curason di su pais.
Informantenan ta indica na DIARIO cu e Dia di Himno y Bandera di Aruba ta sumamente importante den e lucha ayera pero tambe den futuro di Aruba pa su autonomia pasobra e ta duna e motibo pa lucha, cu ta e caracter unico di e Pueblo di Aruba, cu ta carga e formula di victoria cu Aruba tabata tin den realisacion di su propio destino.
“Hubentud di awe no mester mira e himno y bandera como simbolo, pero como representacion autentico di e Puebo di Aruba cu na su idioma propio Papiamento y a base di su musica entrega pa historia cultural, ta presenta su mes na un mundo den cual evolucion a produci cambio den Reino Hulandes, cu no por a nenga mas e caracter unico y e derecho di e Pueblo di Aruba pa forma su propio destino a base di su moral, su cultura y uni pa su idioma Papiamento,” a bini dilanti.
