Ni su morto por a stroba loke el a realisa pa su pais
- Lucha y determinacion ta e marca Himno y Bandera
- Na 2023 Aruba lider den negociacion futuro di Reino
ORANJESTAD(AAN)- “Si mi muri, coy e bandera y sigui lucha”.
Na momento cu e palabranan aki a wordo expresa, poco hende na Aruba y na tur parti di Reino Hulandes y hasta na mundo, por a kere cu Betico Croes lo no a yega mas leu cu entrada di Aruba den e futuro estatal nobo cu el a priminti su pais.
Na e momento cu Betico Croes a lansa e promesa di Status Aparte como condicion estatal pa Aruba por a conoce un mihor destino, e posibilidad pa Aruba un dia por a bira e lider reconoce pa henter Antia y Reino, tabata parce un soño.
Na entrada di decada 70, un direccion fiho pa Aruba tabata parce dificil den e ambiente di turbulencia grandi cu mundo tabata conoce.
E situacion politico na Aruba mes tabata exigi un lider fuerte cu por a entrega e pais un proposito nobo y un guia total pa sigui dilanti.
Status Aparte tabata e condicion grandi di Betico, cu a hancra e posibilidad pa exito di Aruba den futuro, na e posibilidad pa Aruba mes dicidi con e isla ta atende su atentonan.
Na e momento cu Betico Croes a cuminsa papia di Status Aparte, Antia Hulandes tabata tin un bandera cu seis strea, cu tabata simbolisa e seis islanan den su centro.
E Himno di Bonaire tabata wordo uza como Himno di Antia, cu un representacion di Pueblo den Parlamento Antiano y un gobernacion den espacionan di Gobierno Central, cu tabata representa un pais cu hende tabata kier pa existi.
Pa yega na e conclusion aki, cu Antia Hulandes a existi pasobra hende tabata kier pa e existi, mester observa con na diferente momento, pa Antia Hulandes por a sigui existi, un isla mester a cera wowo den su propio lucha.
E historia tan complica di Antia Hulandes, sigur ta presente den e Interim Regeling, cu mester a bira un areglo temporal pero a bira un areglo definitivo cu a dicidi cu Aruba lo ta den posicion di minoria pues sin posibilidad pa exigi su bienestar den Parlamento Antiano.
Un situacion cu pa costumber a bira aceptabel den e pensamento Antiano, pasobra si por a logra cu Aruba ta entrega su cantidad igual di asiento den Parlamento Antiano, tur cos ta posibel y a bira posibel.
E Interim Regeling, e areglo temporal, a parce di lo bira uno eterno ora Betico Croes a lanta para y a presenta su lucha di Status Aparte.
Pa ta hopi franco, el causa hopi risa na prome momento. Pero Betico Croes a insisti.
E Himno y Bandera di Aruba lo recorda Aruba pa semper riba e compromiso cu Betico Croes tabata tin cu su pais y cu cual el a cumpli y ta sigui cumpli te na su morto.
Antia Hulandes na 2000 a introduci un Himno propio cu a pasa pa historia hunto cu e bandera Antiano cu a wordo hiba na su ultimo lugar.
Mester duna credito na esun cu merece e honor di credito. Betico Croes a cumpli cu su promesa cu ta haci cu awe Aruba a bira lider den e negociacionnan cu Reino Hulandes, pa determina un futuro nobo.
E capacidad di Gobierno actual di Aruba pa enfrenta crisis y pa atende cu e retonan cu awe tin mundo den situacion di recesion y desbalansa, ta wordo reconoce dor di lidernan di e otro paisnan cu un tempo tabata forma Antia Hulandes, pa sigui cana den futuro.
E determinacion di Betico Croes pa pone fin na un areglo eterno y e forma cu el a haci Aruba, lider di e propio destino di Aruba, awe ta manifesta su mes den Reino.
E determinacion di Aruba pa sigui cana, e caracter firme di e Arubiano, e patriotismo cu ta resona ora Aruba presenta, ta habri portanan di futuro pa Aruba.
Central ta keda e pensamento cu si Aruba por a logra su Status Aparte y sigui cana y conoce progreso, Aruba por logra tur loke e pone su dilanti.
Ayera Betico Croes a haci un promesa na su pais, cu el a entrega un Himno, un Bandero, un idioma Arubano, un futuro nobo.
Te despues di su morto e ta sigui cumpli sirbiendo di inspiracion pa Aruba y henter mundo den e lucha tenaz cu crisis mundial ta entrega tur hende.
Un lider ta nace lider y nunca ta muri como lider, cu hasta despues di su morto ta sigui inspira.
E Himno y Bandera ta keda e herencia mas precioso cu Betico a laga atras como lider di su pais, Aruba Dushi Tera!
