ORANJESTAD (AAN): E director di Oficina di Turismo (A.T.A.) pa region di Merca, Ed Malone ta bay baha di su puesto dentro di poco y ta bay wordo reemplaza pa Sjeidy Feliciano y Diamars DIARIO a logra haya un entrevista exclusivo cu Malone, kende a bin Aruba pa prome biaha na 1987 ora cu e compania pa
cual e tabata traha a cumpra Americana Hotel.
El a yega Aruba pa durante un periodo temporal, pero na dado momento e compania a pidie si e kier keda y maneha e hotel y el a bay di acuerdo.
“Mi a pasa casi 11 aña na Americana Hotel te ora cu Allegro a cumpre y durante e tempo ey mi tabata presidente di AHATA pa 5 aña, mientras cu mi tabata bastante envolvi cu Caribbean Hotel Association di cual despues mi a bira presidente tambe, segun Malone.
El a sigui traha cerca diferente hotel tambe manera Bushiri y Talk of the Town, como tambe el a haci diferente proyecto di consulta, incluyendo cerca Gold Coast.
Malone a indica cu ora cu minister di Turismo Otmar Oduber a cuminza e proceso pa ATA bira sui generis, el a wordo pidi pa bay Nee Jersey pa durante 6 luna traha riba un transicion cu tabata tumando lugar na e oficina di ATA na New Jersey.
“Seis luna a bira otro 6 luna y otro 6 luna, despues di cual nan a dunami e trabao di director di e area di Merca permanentemente”.
En total mi a keda eynan 9 aña, segun e director saliente.
Dimes frecuentemente e tabata bin Aruba pa reunion y combersacionnan importante.
DIARIO a pidi Malone kico tabata algun di e retonan cu e tabata tin como director di ATA pa Merca.
El a splica cu na 2014 ATA y Turismo rond mundo ainda tabata saliendo for di e crisis financiero.
“Nos tabata trahando duro pa aumenta e demanda pa destinacion di Aruba y nos tabata tin un bon operacion eynan cu hopi bon hendenan trahando pa nos”.
Importante tabata pa nos traha riba stabilidad den e organizacion.
Esey sigur tabata importante mirando cu tabata tin diferente cambio tumando lugar, segun Malone kende a indica cu stabilidad tabata algo esencial, mirando cu Merca ta e mercado mas grandi pa Turismo di Aruba.
“Un di e motibonan principal dicon nan a pone mi eynan tabata pa facilita e proceso pa haya un director permanente pa e area y despues cu pa 1 aña y mey no a encontra otro candidato nan a dunami e puesto di director y mi a haci esaki”.
Mi trabao temporal na Aruba pa 2 luna na 1987 a dura 36 aña y mi trabao temporal di 9 luna na New York a dura 9 aña, Malone a sigui bisa.
