Staatssecretaris a bishita na Santa Rosa y a keda impresiona di kico tur ta wordo produci na Aruba

ORANJESTAD (AAN):  Departamento di Agricultura, Cria y Pesca Santa Rosa tabata tin e honor y placer di ricibi bishita di Staatssecretaris di Hulanda sr. Eddie van Marum hunto cu su delegacion.

Riba e mainta aki nan a wordo ricibi pa directora di Santa Rosa sra. Nathalie Maduro y tambe presente minister di Sector Primario sr. Geoffrey Wever.

Despues di un introduccion chikito caminda henter e delegacion a ricibi un bunita pechi di Santa Rosa como regalo y asina duna inicio na e recorido den Santa Rosa pa admira seccion y cultivonan cu e departamento mes ta produci. E recorido tabata canando y asina haya un splicacion corto di kico ta tareanan responsabilidad, proyecto y manehonan di Santa Rosa riba e tereno di Sector Primario.

A admira matanan di fruta y berdura cu tin planta y tambe haya un splicacion di e tipo di Bacanan cu nos tin y nan rasa. Asina e recorido na pia a continua caminda a yega na e seccion caminda tin planea e Agri Innovation Park (AIP) lo mester bin.

A tuma un momento di descanso y asina sr. van Marum haya un presentacion corto di minister sr. Geoffrey Wever y sr. Erwin Greoneveld di kico lo bay bira e proyecto en cuestion. Tur presenta na e ocasion aki a ricibi algo pa refresca cu ta un tremendo juice di lamunchi prepara y tambe un drigidek como pasaboca.

E recorido a continua despues pa e DC ALFA Food Forrest caminda tambe a haya un splicacion en corto di kico tabata e idea y pa ilustra otro sistema sostenibel cu nos ta studiando pa local ta su

contribucion comercial. Pa culmina e paseo den Santa Rosa a yega na “Cunuco Chabelito” cu ta nos “Kinderboerderij” caminda varios di nos productornan local tabata anfitrion.

Aki e Staatssecretaris sr. Eddie van Marum a bishita cada un di nos productornan local invita pa asina ceraa conoci cu nan y admira kico ta e productonan cu nan ta produci y ofrece na e pueblo di Aruba. Asina a haya un splicacion cortico di cada productor presente. Por a admira sra. Rachelle Peterson kende ta produci varios tipo di mushroom. sr. Jair Britten di “Cunuco Calbas” kende ta un productor di carni

fresco, Brandon Maduro y Angelique Croeze di “Croeze Farm” cu su variedad di berdura. Sra. Shirley Illidge cu ta produci varios liqueur, esnan di Pestana Ranch cu nan produccion di Webo Fresco, sr. Jake Arends di “Cunuco Fresh” cu ta produci lechuga fresco, sr. Daniel Barros kende ta un apicultor y ta produci honing y otro productonan, sr. Charles Koolman kende ta un productor di pinda masha popular y na final tabata sr. Ivan Dijkhof di “Sunny Greens cu ta produci varios Micro Greens.

Culminando sr. van Marum su bishita a dirigi palabra na tur presente di ta masha contento y impresiona di kico tur ta wordo produci na Aruba den un clima no facil y ta masha contento di por a admira tur esakinan hunto na un ocacion asina special.

Di parti di Departamento di Agricultura, Cria y Pesca Santa Rosa  ta gradici primeramente VNO Aruba pa por a hasi tur posibel pa Staatssecretarfks sr. Eddie van Marum bishita nos departamento. Na minister di Sector Primario sr. Geoffrey Wever y tur productor local cu por tabata presente pa hasi e dia uno formidabel pa nos bishitantenan.