Diego de Cuba, Presidente di STA:
“Huez a comete un eror bastante grandi, y STA ta bay den bodemprocedure”
ORANJESTAD (AAN) – Diego de Cuba, Presidente di Sindicato di Trahadornan di Aruba (STA) a comenta, durante un entrevista cu DIARIO, cu STA a perde e caso cu el a entama tocante retiro di dos security na servicio di Triple A.
“Berdaderamente, mi tin cu bisa cu e sentencia di Huez den e caso cu STA a entama contra Triple A, door di e retiro di dos empleado di seguridad, no a cay na nos fabor den e procedure aki, di e Kort-Geding” De Cuba a menciona, y na su opinion e Huez cu a firma esaki a comete un eror bastante grandi.
Logicamente e ta un ser humano y e tambe por comete eror, pero lesando e sentencia STA ta kere cu el a bay drumi full den scochi di Triple A, y no a tene cuenta cu nada di loke e abogado di e sindicato a trece dilanti.
“Laga mi aclarea un cos. Tin ora nan ta bisa ‘no hay mal que por bien no venga’ y mi tin cu bisa tambe ‘perde un bataya no ta nifica perde e guera. Di con mi ta bisa esaki? Pasobra awo nos ta bay den Bodemprocedure, contra Triple-A N.V, pasobra cu nos ta haya cu e sentencia aki ta completamente for di sla, y e no ta na su lugar.
Nos tin cu analiza kico a pasa na Triple-A y kico Triple-A a bin cu ne den Corte, manipulando Huez y nos contrato colectivo, y Huez a cay den nan trampa”, Diego de Cuba a subraya.
De Cuba a expresa cu e tin cu duna Triple-A pabien door di ta manipuladornan grandi, y bay completamente en contra di nos contrato colectivo.
E lider sindical a bisa cu e Ley di Contrato Colectivo ta sagrado y akinan ta caminda Huez, mi no sa si e sa di dje, y no a tene cuenta cu ne. E ley di Contrato Colectivo ta bisa cu cualkier disputa cu tin of cualkier documento cu ta bay en contra di e CAO, cual ta mara na e dos partidonan (den e caso aki e dunador di trabao y e sindicato) lo wordo declara nulo.
“Den e caso aki Triple-A, a haya ta bon pa bin cu cosnan bieu dilanti den Corte, anto uza nan como motibonan pa retira dos persona como motibonan pa retira dos persona di biaha! Contrato Colectivo ta bisa cu ora bo tin intencion pa bay castiga un hende, bo tin cu mand’e un carta, anto den dje bo tin cu describi kico ta e infraccionnan cu el a comete”, Diego de Cuba, lider di STA a recalca.
