Diabierna lo tin marcha den cayanan di San Nicolas
ORANJESTAD (AAN): Alumnonan di St. Paulus School situa na Jim Blue Jacketstraat 2 na San Nicolas, ta preparando un fenomenal ‘Marcha Cultural’ riba Diabierna 15 di Maart 2024.
Esey ta loke cabezante Randy Arends di e scol a indica na DIARIO. El a splica cu nan Marcha Cultural 2024 lo ta den e concepto, unda e alumnonan lo bay presenta “Cultura di Aruba” den diferente forma riba caya.
Cabezante Arends a splica cu e Marcha Cultural lo bay ta culminacion di seis siman di les cu e alumnonan a ricibi di e topico ‘Aruba’. E scol a haci uso di e programa di ‘Aruba Certification Program’, y tur klas a haci uso di e material. Na final nan lo presenta tur loke e alumnonan a siña den un forma hopi creativo riba caya.
E lo bay ta un presentacion di full topico di Aruba, riba caya bao tononan di musica tipico. Esaki lo bay ta e di cuatro edicion cu St. Paulus School ta haci den cuadro di Marcha Cultural. Arends a indica cu nan a cuminsa na 2018, cu e idea di haci un ‘expo’ riba caya.
Pa 2024, e Marcha Cultural aki a ricibi un sosten grandi di UNOCA, y via e plataforma di Aruba Tourism Authority, esta ‘Ban Serio!’ tambe a haya sosten como patrocinador.
Ruta di Marcha: Randy Arends a indica cu e Marcha Cultural 2024 di nan lo sali for di St. Paulus School pa 4:30 pm, y lo cana bay pabao riba Pastoor Hendrikstraat. Ora nan yega Rayo di Solo, lo bira bay zuid den Torenstraat. Na altura di Museo di Industria (Watertoren), lo sigui pa Caya Dick Cooper, sigui bay zuid, pasa e mesun ruta di Carnaval di Mucha.
Pero ora e Marcha Cultural yega na Aruba Carnival & Entertainment Village, nan lo djis sigui bay nort na e cruzada aki, y bay bek pabao riba Pastoor Hendrikstraat rumbo scol. Durante e parada, nan lo percura pa e alumnonan haya algo di bebe y come, y na final mayornan por busca nan yiunan.
Pueblo ta invita pa para na e ruta, y siña mas di Aruba y aprecia loke e alumnonan a haci y representa cultura di e isla riba caya.
