Diabierna awor
ORANJESTAD (AAN): Muchanan cu aworaki ta den 5e klas of 6e klas di scol basico, kendenan ta bibando Pariba di Brug y cu ta pensa di kizas sigui studia na Colegio San Agustin MAVO, lo haya un chens unico Diabierna awor di mira di cerca con e scol aki ta opera.
Pesey mes, e scol aki cu ta situa na Pastoor Hendrikstraat 61 na San Nicolas, ta organizando riba Diabierna 15 di Maart 2024 un ‘Open Dag’ interactivo hopi unico pa e futuro studiantenan aki bay mira.
Cabezante Jeffrey Kelly den un entrevista cu DIARIO, a splica cu nan ‘Open Dag’ aki lo bay ta Diabierna for di 5:00 pm te cu 6:30 pm, y nan ta invita e muchanan di Scolnan Basico pa bin cu nan mayornan pa asina haya contesta pa tur nan pregunta.
Cu e Open Dag, nan ta habri porta di scol pa ricibi bishitantenan. E idea ta cu nan lo bay “draai les” di 20 minuut, pa asina e muchanan aki di Scol Basico ta sinta un rato den klas y haya experiencia di e forma cu ta duna les na e MAVO School aki.
Kelly a indica cu nan a manda invitacion pa varios Scol Basico pa suministra na e alumnonan di 5e y tambe 6e klas. Pues un chens unico pa cana y wak henter e scol, y conoce parti di e docentenan.
Celebracion Himno y Bandera: Ora cu esaki finalisa, pa 6:30 pm lo bay tin un Celebracion di Himno y Bandera. Esey lo ta for di 6:30 pm te cu 9:00 pm riba tereno di scol mes. Lo bay tin varios stands den gang di scol, y tur alumno di 2e Klas lo bay bende producto tipico di Aruba, e.o. pastechi, croket, cuki, arroz con pollo, y mas cuminda crioyo cu ta ser liga na celebracion di Dia di Himno y Bandera. Lo ta na prijs cu ta cay bon na cartera di pueblo.
Cabezante Kelly a indica cu tur fondo recauda ta pa organiza nan anochi di “Diploma Uitreiking” cu lo bay ta na luna di Juli venidero.
E mesun anochi riba e escenario principal, e alumnonan di Klas 1 ta trahando cu varios vak, e.o. Papiamento, Arte, NNT, Godsdienst, lo bay haci un opdracht. Esaki ta e.o. declamacion di poesia, baile, y canto.
Jeffrey Kelly ta manda invita pueblo en general pa celebra hunto cu nan, Diabierna na Colegio San Agustin, e Open Dag combina cu Dia di Himno y Bandera.
