PHILIPSBURG: St. Maarten Tourist Board (STB) a indica cu pa e lunanan di Juni, Juli, y Augustus, e isla a ricibi un total di 80.006 bishitante.
Un total di 72% di esnan cu a yega den e lunanan di verano aki, a bin for di Merca. Diestres porciento a bin di Francia. Tambe 13% di e resto di Europa. Un porciento a bin for di Caribe, y 2 porciento di otro regionnan manera Sur America, Canada, y Asia.
Pa e lunanan di verano, den Juni e isla a ricibi 25.440 bishitante. El a yega un peak na Juli cu 30.661 bishitante. Compara cu Juli 2019 (prome cu Covid), esaki tabata un 2 porciento aumento den cantidad di bishitante. Augustus si a conoce menos bishitante cu 23.902.
Si analiza e yegada di bishitantenan segun mercado, keto bay e mercado Mericano ta sigui di ta lidera e recuperacion, hasta den luna di Augustus ora cu e prestacion total a cay un tiki.
E yegada di Merca ta sigui crece, compara cu e lunanan respectivo na 2019, cu a mustra un prestacion aun mas fuerte den 2021 compara cu esun di dos aña pasa.
Di otro banda, bishitantenan di Canada y di Sur America ta hopi abao mes, y esey a pone cu e cifra di Augustus a cay asina.
Board di STB a ehecuta un campaña agresivo di mercadeo y relacion publico den mercado Mericano pa captura e interes di viaheronan, y e campaña a aumenta e concientizacion di consumidornan y ta mirando mas y mas reservacion ta wordo haci, y e factor di ocupacion den asientonan di vuelo.
Un di e campañanan cu St. Maarten a lanza ta e campaña di ‘SXM Villa Vibes’ cu ta enfoca e producto villa di e isla.
E campaña ey no a wordo pusha via Social Media, pero via di prensa y cu a aparece den The Boston Globe, Seattle PI, Luxury Travel, y demas publicacionnan grandi, cu ta yega na miyones di hende.
