Ministro Dangui Oduber cu bon noticia
ORANJESTAD (AAN): Den cuadro di diversificacion Minister di Turismo y Salud Publico sr. Dangui Oduber ta comparti cu e aerolinea Southwest ta aumenta nan vuelonan pa Aruba.
Southwest ta aumenta nan operacion pa Aruba cu 5 vuelo pa siman desde Baltimore (BWI) entrante 4 di juni 2024. Nan lo mantene e frecuencia di vuelo aki te cu 4 di augustus 2024, cu un posibilidad di extende esaki pa ful un aña. Esaki ta nifica mas capacidad di asiento for di Merca pa Aruba.
Actualmente e aerolinea ta operando 1 vuelo so pa siman. E aumento di vuelo di Southwest ta bay haci cu lo bay tin un aumento di “seating capacity" pa Aruba, cual ta representa un aumento di 572 stoel.
Entrante awe lo cuminsa cu benta di tickets entre AUA-BWI.
Minister Dangui Oduber a duna di conoce cu e diversificacion di rutanan di varios aeroliña ta cuadra cu e maneho di Gobierno. Minister Dangui Oduber ta satisfecho con Aruba su turismo ta desaroyando y ta gracidi un biaha mas e airlift committee pa e bon trabao cu nan ta bin ta haciendo.
