Ministro Plenipotenciario Thijsen a topa cu embahador Italiano:
ORANJESTAD (AAN): Den un declaracion for di Hulanda, Ministro Plenipotenciario mr. Ady Thijsen a bisa: ‘Mi ta contento cu tur loke te ainda nos a logra den e cooperacion entre Gabinete di Minister Plenipotenciario di Aruba y embahada di Italia. Y mi tin speranza cu cosnan bunita so lo sali for di relacion aki pa loke ta futuro.’
El a bisa esey, despues di un encuentro cu embahador di Italia na Hulanda Giorgio Novello.
Embahador Novello a invita Minister Thijsen na su oficina pa mira atras riba eventonan comun, manera e anochi cultural na e Instituto Italiano di Cultura na Amsterdam titula “Aruba and Italy meet”. Un evento cu a marca un bunita comienso di e cooperacion entre Italia y Aruba, na unda e similaridad entre e dos paisnan a keda presenta. E di dos proyecto cu ta parti di e cooperacion aki ta e viahe di estudio di e entrepreneur Arubiano den produccion di biña Hubert Yarzagaray na e region di Treviso na Italia. Un viahe exitoso cu a brinda oportunidad pa un entrepreneur di Aruba engrandese su conocimento riba e tereno di biña na e pais productor di biña mas grandi di mundo cu ta Italia.
Minister Thijsen un biaha mas a duna su palabranan di gratitud na embahador Novello pa duna contenido concreto na e cooperacion entre su embahada y Gabinete di Minister Plenipotenciario di Aruba y a bisa cu lo sigui den dialogo pa mira riba cual otro tereno por tin cooperacion. E potret ta cortesia di Arubahuis.
