ORANJESTAD (AAN): Famianan a keda asombra pa mira cu e instituto educacional di mas halto na Aruba, aparentemente a lubida tur nan propio reglanan y no ta cumpliendo cu medidanan y protocol pa mitiga brote di Coronavirus.
Pa colmo, e den fin di siman por a nota con na condado di Marin na California (Merca), un docente no-vacuna y sin tapaboca na un scol basico, a plama e virus di Covid pa mitar di e studiantenan di su klas. Esey ta un relato cu CDC di Merca mes a duna.
E docente femenino a bay duna les aunke e tabata tosando cu keintura y tambe dolor di cabez. Y awor e alumnonan ey a contagia nan demas famia tambe.
Di henter e scol, ta dos docente so no a tuma vacuna, y net esun ey a bira malo y contagia mitar di su clas.
Na Aruba: Na Aruba tabata admirable pa mira cu e institucion educacional aki a manda un Memo pa tur studiante pa informa nan riba reglanan cu e scol a tuma pa asina mitiga e brote di Coronavirus. E Memorandum aki a wordo manda prome cu e temporada di scol a cuminza, y a indica cu tur docente y studiante tin di cumpli cu protocol y reglanan sanitario vigente, e.o. e obligacion pa bisti tapaboca, di usa hand sanitizer, y tambe mantene distancia fisico.
E tabata un alivio pa mayornan a lesa e Memo aki, pa asina nan a sinti nan mes un tiki mas trankil, sabiendo cu nan yiu lo bay ta safe hayando les na instituto educacional di mas halto na Aruba.
Sinembargo siman pasa algun studiante a bin realiza, cu tur e fanfaria di manda Memo ey parce ta djis un sorto di show. Pasobra riba Diamars siman pasa mes ora di atende un klas, pa nan sorpresa a bin nota cu den e espacio chikito di nan klas, ningun protocol di seguridad pa cu Covid-19 a wordo cumpli cune.
Un klas hopi chikito cu 20 alumno geprop riba otro, pues ningun clase di distanciamento social, y e docente para dilanti ta duna les sin ningun tapaboca na su cara.
Y den e lokaal tabatin varios studiante sin ningun tapaboca bisti! Esaki a haci varios studiante bira incomodo cu e situacion aki.
Con por ta cu instituto educacional di mas halto na Aruba ta acepta esaki? Con por ta cu esun na cabez no ta haci algo of sikiera controla si tur docente ta cumpliendo cu regla of no.
Tabata parce cu literalmente instituto educacional di mas halto na Aruba tabata promoviendo mas plamamento di e variante Delta kizas den klasnan? Loke sea e ta, esaki no ta parce di ta un acto responsable.
Remarca ta cu net e lugar aki cu ta e grado mas halto di educacion, cu sa cu tin di cumpli cu reglanan pa proteha studiantenan y demas personal, no ta eherce control pa check si e klasnan ta cumpliendo cu regla of no.
E reclamo cu DIARIO a ricibi di algun mayor di studiantenan ta cu nan no ta desea pa hende por sigui haya les den un ambiente asina. Nan ta haci un suplica na cabezante pa tuma nota di esaki, y bin cu medida pa asina garantiza seguridad di tur hende, y garantiza cu e brote di Covid-19 lo no sigui tuma lugar durante les, of riba tereno di e lugar tampoco.
A lo menos, sikiera cumpli cu e Memo cu nan mes a manda. Pero no cu un klas si ta cumpli, y e otro klas nada, un docente si ta pone tapaboca, y e otro docente no ta haci nada. E mester ta uniforme cerca tur klas.
Tin algun mayor cu a hasta bisa, cu nan ta spera cu cabezante lo por ‘reset’ e medidanan di seguridad, y si acaso resulta cu e espacio di klasnan ainda ta chikito pa asina hopi studiante, coda cu tin diferente opcion ainda pa haci, e.o. duna les virtual (online). Di e forma aki bo ta yuda mitiga brote di Coronavirus, specialmente e variante Delta cu ta basta agresivo.
“Sinceramente mi no a spera cu net nan, net esnan di instituto educacional di mas halto na Aruba cu ta hendenan di futuro, hendenan di yen profesionalismo, y net nan ta bay haci cos dehado asina pa cu protocolnan anti-Covid.”
