ORANJESTAD (AAN): Den e longweekend cu a caba di pasa na Puerto Rico, oficialnan di US Customs and Border Protection (CBP), hunto cu agentenan di Air and Marine Operations (AMO),
a colabora cu demas agencianan oficial pa confisca un total di 257 kilo di cocaina, y a aresta 5 contrabandista cu a purba di drenta teritorio Mericano cune.
E droga aki ta bin di Colombia, y e ta cruza lama Caribe cu speedboat tipo Go-Fast cu ta bay prome pa Republica Dominicana, y despues ta busca un chens pa yega cune na Puerto Rico.
Esaki ta wordo haci danki na e hecho cu ta detecta speedboat coriendo den area di e isla, y mesora ta bay pa captura nan.
Ademas di esey, nan a logra captura 14 ilegal di Haiti, y 11 ilegal di Republica Dominicana.
Nan ta notando cu narcotraficantenan ta cambiando nan sistema di purba drenta cu droga. Pero na su mesun momento, agentenan cu ta controla frontera tambe ta cambia nan tactica pa asina interumpi e operacion di e contrabandistanan aki.
Tabata Diadomingo cu un avion di Caribbean Air and Marine Branch (CAMB) cu nan Multi-Role Enforcement Aircraft (MEA), a detecta un boto cu cinco persona abordo, como 38 miya nautico panort di Carolina, na Puerto Rico.
Mesora a manda un unidad di AMO Marina y tambe un boto chikito di US Coast Guard pa check e speedboat tipo yola, cu tabatin 2 motor outboard engine. Nan a intercepta esaki ora e tabata 9 miya nautico panort di San Juan. Abordo tabatin 4 homber y 1 muher ilegal di Republica Dominicana. Nan a wordo deteni, y e 257 kilo di droga a wordo confisca door di Homeland Security.
Dialuna 6 di September, a detecta cu tin traficacion di hende den area di Mayaguez na Puerto Rico. Aki oficialnan di US Border Patrol a logra captura y detene 14 persona adulto ilegal procedente di Haiti.
Dialuna tambe, agentenan di frontera a detecta cu tin traficacion di hende den area di El Comabte na Cabo, Rojo na Puerto Rico. Aki a bin detene 9 homber y 2 muher adulto ilegal di Republica Dominicana.
