||| Informe cu a shock tur hende! --- *Hasta 5 pensionado tambe a haya FASE di 950 Florin --- *Hasta un defunto a haya FASE di 950 Florin
ORANJESTAD (AAN): Dialuna a tuma lugar den Parlamento di Aruba, e reunion publico pa atende e asunto di e Sistema FASE cu a percura pa miles di hende a keda haya entrada ora cu e Pandemia a dal duro, y hopi hende a keda sin entrada.
Aunke enberdad e yudanza a yega cerca hopi hende y tabata bon bini, toch ta hopi hende conoce diferente storia con hopi ciudadano sin entrada, a wordo rechaza y a keda sin haya FASE.
Y esaki ta loke a pone hopi hende bira furioso riba Dialuna, ora cu a bin sali na cla cu hasta varios Ambtenaar tambe a wordo poni riba lista pa mensualmente haya pago di FASE.
Ministro Glenbert Croes a indica cu e ta lamenta cu tin hende cu a purba di abusa di e Sistema FASE. Pero el a enfatiza cu tur esaki lo worde atendi cune. Pero segun e Ministro, esnan cu a haci maluso di e sistema ta minimo.
Parlamentario Miguel Mansur di Accion21, a mustra con e maneho di FASE a bay cu debilidadnan den control. Esaki a socede ora cu a extende e Sistema FASE, y e controlnan a bira hopi lakso.
Aki ta unda cu el a divulga, cu por lo menos 20 Ambtenaar riba payroll di Gobierno, tambe a logra haya pago di FASE pa 950 Florin mensual. Tambe a bin descubri cu hasta hende cu a fayece, nan nomber a keda inclui pa ricibi e 950 Florin mensual.
Mansur a agrega, cu a descubri tambe cu 5 Pensionado (cu ta haya placa di pensioen volle pond), a haya FASE di 950 Florin. A descubri cu 4 hende riba VUT, a cobra nan FASE di 950 Florin.
Y esakinan ta dato cu Gobierno mes a acumula.
Ministro a bisa, cu tur e hendenan aki lo tin di bay paga tur placa bek, te na e ultimo debchi.
Segun Mansur, e tambe ta convenci cu Partido MEP a usa e Sistema FASE pa core campaña, y ta kere cu Ministro di Husticia a bin gaña eyden, como cu tin tur cos graba ora e ta campaña y bisa cu despues di Sistema FASE, nan lo bin cu Sistema TIO.
El a menciona tambe con hendenan aki a haya placa extra di FASE, siendo cu tin hopi famia na Aruba cu a haya 0,00 Florin, nada, y nan a djis wordo neglisha door di e sistema.
Pero e hecho cu Ambtenaar a haya pago di FASE, ta un berguenza. Mansur a bisa cu tur esaki ta un falta di credibilidad di politiconan, cu ya ta na suelo caba. Pesey Parlamentarionan ta sinti cu nan tin tur nan derecho pa por cuestiona 79 miyon Florin cu a worde paga sin base legal.
