Aunke Centro Colorado ta acepta di 18 aña pariba...
- A yega di haya un mucha di 9 aña cu ta adicto na substancia
ORANJESTAD (AAN): Stichting Hunto ta dunando yudansa na esnan adicto, pa asina nan por sinti nan mes bek como un berdadero ser humano.
Den un entrevista cu Zulianne Faro di Stichting Hunto, el a splica cu e clientenan tin un programa cu ta start di 6’or di mainta caba. Nan ta lanta pa cuminza cu baño, come desayuno, y e dia ta sigui segun plan planea di antemano.
Tin algun dia, nan por cana bay na e beach cu tin na area di Sero Colorado, tin biaha tin actividad di core bicicleta, tin horario di deporte, y tambe tin reunionnan. Pues henter siman tin un programa completo, incluyendo Handenarbeid. Nan programa di siman ta constantemente bezig.
Riba Diasabra y Diadomingo ta un dia liber mas pa nan, aunke nan tin nan ‘tarea’ di haci, e.o. haci nan camber limpi, etc.
Un biaha pa luna, tin un dia grandi di limpiesa pa haci full e centro na Sero Colorado limpi. E ta bayendo bon, y nan ta hopi entusiasma pa haci esaki, y nan ta orguyoso di ta mantene e lugar limpi.
Menornan di edad: Segun Zulianne Faro, un reto cu e ta haya su mes hopi biaha cu ne riba caya, ta cu tin hopi menor di edad, y eynan e mes como profesional por acerca y papia cu e hobennan ey, sinembargo tin di corda cu e Centro na Colorado tin exigencia cu ta acepta esnan di 18 aña bay ariba.
Aworaki Aruba no tin ningun instancia pa atende mucha cu ta adicto, aunke nan mes ta trata na yuda, papiando cu nan, y tin team di 3 persona cu ta subi caya y purba na convence e muchanan aki y nan famia pa reuni na e Inloophuis, pa asina trata na haya un solucion pa e menornan di edad aki, pasobra e problema ta bira hopi grandi.
Segun Zulianne Faro, si e no ta ekiboca, e mucha di edad mas abao cu nan a yega di atende, a bin despues di un yamada di scol, y nan a bay check. A confirma cu tin consumo pisa di substancia, y e mucha tabatin apenas 9 aña di edad. Pues esey pa nan, ta algo hopi alarmante.
“Ami persona mes tin un yiu di edad ey, pues mi por imagina e ta algo hopi pisa como bo ta mira con e edad ta baha, baha y baha. Pues esey ta parti cu eynan mi ta sinti cu falta yudansa pa e grupo di chikitinnan, pa un accion corecto.
