Premier Eman a indica
*Pasobra legalmente awor si De Meza ta minsteriabel
ORANJESTAD (AAN): Diamars atardi, Parlamentario Mike de Meza a core duna un conferencia di prensa unda cu despues di tur e tempo aki, el a duna e noticia cu Fiscal di Ministerio Publico a dicidi cu no ta sigui persigui’e. Den corto el a mustra cu un Fiscal nobo a yega na un otro decision, despues di a sinta na mesa cu e ekipo huridico di e candidato cu a obtene hopi voto pa AVP den ultimo eleccion.
Esey nifica cu finalmente toch, Mike de Meza ta ‘ministeriabel’.
Basa riba esaki, riba Diamars anochi mes, Minister-president mr. Mike Eman a expresa su satisfaccion cu despues di un proceso largo y compleho, finalmente a yega claridad den e caso cu durante casi dos aña a mantene ing. Mike de Meza y su famia den un periodo di incertidumbre.
Segun Prome Minister Eman, e resultado a marca e conclusion di un capitulo dificil, tanto pa e persona envolvi pero tambe pa Gobierno y nos pais. “Esaki ta un momento importante. Finalmente tin claridad den un proceso cu a dura hopi tempo y cu a crea hopi incertidumbre. Como Gobierno, nos ta alivia cu e capitulo aki por cera,” Prome Minister Mike Eman a declara durante un momento di prensa extraordinario diamars anochi.
Prome Minister a expresa su reconocemento pa e manera cu Mike de Meza a enfrenta e proceso cu dignidad, perseverancia y respet pa e institucionnan di estado. El a destaca cu e impacto di e situacion no a limita su mes solamente na colega de Meza, sino cu su famia tambe a carga e peso di e proceso durante e ultimo casi dos aña. “Cu un persona su bon nomber ta poni na duda, esey tin un impacto profundo, no solamente riba e persona mes, pero tambe riba su famia. Merece reconocemento pa e forma cu el a enfrenta tur e situacion aki,” Prome Minister a indica.
Na e momento aki, Mike de Meza a comunica cu e kier tuma algun dia adicional pa reflexiona prome cu tuma un decision definitivo tocante un posibel nombramento como mandatario. Gobierno ta respeta completamente e decision di duna e espacio necesario pa reflexion y lo sigui e proceso institucional una bes cu e comunica su posicion.
Prome Minister a enfatisa cu e situacion actual no ta cambia e compromiso di Gobierno cu continuidad administrativo ni cu e ehecucion di su programa di gobernacion. Gabinete ta sigui cumpli cu su responsabilidadnan y e prioridadnan di Gobierno ta keda enfoca riba bienestar di pueblo di Aruba.
Durante su declaracion, Prome Minister a indica cu Gobierno ta mira e conclusion di e proceso tambe como un momento di reflexion pa e pais. Segun Premier Eman, e caso a pone na prueba diferente mecanismo institucional, incluyendo e proceso di screening y evaluacion cu ta forma parti di e procedimento pa nombramento di funcionarionan publico. Como pais nos por saca enseñansa di e proceso aki. El a pone nos institucionnan na prueba y ta importante cu nos sigui fortalece e procedimentonan institucional, semper cu respet pa estado di derecho y pa e garantianan cu nos sistema legal ta brinda na tur ciudadano.
Mike Eman a destaca cu colega Meza ta un persona cu durante hopi aña a prepara su mes pa carga responsabilidad gubernamental y cu, durante e periodo pasa, a sigui dedica su atencion na diferente tema di importancia nacional, incluyendo desaroyo di infrastructura, energia y otro prioridadnan strategico pa Aruba. “Loke ta importante awe ta cu finalmente tin claridad. Gobierno ta mira padilanti y lo sigui e proceso cu responsabilidad y respet pa e decision personal cu Mike de Meza mester tuma,” Prome Minister a afirma.
