ORANJESTAD(AAN): Soroptimist International Club ta un organizacion internacional cu ta traha na bienestar, interes y beneficio di hendenan muher rond mundo.
Diasabra awor ta bay tuma lugar inauguracion oficial di Soroptimist International Club of Aruba y durante un conferencia di prensa mentor di e club y miembro di e union Hulandes Marlene van Benthem a hiba palabra.
Van Benthem a yuda institui e club di Aruba.
“Ta un honor grandi cu awor cu 21 miembro nos por ricibi e charter y honestamente mi tin cu bisa cu mi ta enormemente impresiona cu poder di e miembronan aki na Aruba”.
E proyectonan cu nos a hinca den otro y tur e diferente profesionnan cu e hendenan muher aki tin, ta trece un balor agrega enorme na e red internacional cu nos tin, segun van Benthem.
El a splica cu Soroptimist International ta para pa mehoracion di e posicion di muchanan muher y hendenan muher rond mundo.
Segun e mentor, e club di Aruba sigur lo bay contribui enormemente cu esaki.
Lotte van Uchelen, presidente di e Union Hulandes, a hiba palabra tambe y a trece dilanti cu e club di Aruba ta bay ta e di 102 club di Soroptimist.
“Nos ta haya esaki hopi importante, pasobra te ainda falta pa duna hopi atencion specifico na e posicion di muchanan muher y hendenan muher, pasobra esaki ta hopi necesario”, segun van Uchelen.
El a splica cu e red internacional di Soroptimist tin programanan specifico por ehempel pa educacion y beurs di estudio pa muchanan muher, pero e rednan ta yuda tambe cu otro proyectonan.
