Relacionista Publico DIMP Meverly Romano:
- Como 15% sea no a paga nada of no a paga completo
ORANJESTAD (AAN)-- Tocante cifranan cu DIMP ta wak cerca nan, Meverly Romano, Relacionista Publico di DIMP, ta indica cu na e momentonan aki, cu nos ta na November, nan tin 100.930 vehiculo di motor registra. “Un par di luna pasa mi kier sa nos a yega 100.000, aworaki nos ta yegando 101.000, kiermen e cantidad di vehiculonan cu nos tin ta registrando ta aumentando basta lihe y na A-wagen so nos tin 85.309. E otro categorianan hunto e ta yega 100.930.
Di tur e categorianan hunto nos tin 85% di e automobilistanan y motociclistanan a cumpli. Esaki ta un cantidad di 85.856 number, cu tin pago riba nan di e aña completo, y na e momentonan aki e belasting completo di e aña aki mester ta paga. Pues, nos tin 85.856 cu a cumpli y esey ta representa 85% y nos tin 15% cu no a cumpli. Anto e 15% aki ta un cantidad di 14.812 auto.
Kiermen, nos tin 14.812 vehiculo riba caminda cu no tin e pago di aña 2026, haci completamente. Esaki ta cu nan a paga sea mitad di aña so, of no a paga nada mes. E cantidad di personanan cu no a paga nada di 2026 ta 8.042. Anto 6.770 a paga solamente e mitad di aña y nan falta di paga e di dos mitad di aña. Kiermen, esaki ta representa 15% di e cantidad di vehiculonan cu nos tin registra y manera nos sa, e incumplimento ta mas grandi den e plachinan A.
Esaki ta un total di 12.712. Anto, despues nos tin e otro categorianan cu ta menos, pero tambe ta hala nos atencion cu ta e brommernan, e MFA-plachinan. Esakinan ta 568. Nos tin e V-carnan tambe 764 cu no ta paga, of no ta completamente paga di e fin di aña. E pachinan di nomber, esnan personaliza, nos tin 149, e Diesel trucknan 197, y e plachinan T ta 235. Esaki ta e plachinan cu ta resalta den incumplimento”, señora Meverly Romano, Relacionista Publico di DIMP a relata.