Prome Minister ta relata:
ORANJESTAD (AAN) – Den conferencia di prensa di Gobierno, Dialuna, Prome Minister Evelyn Wever-Croes a enfatiza riba e hecho cu vacunacion ta e medio mas eficiente pa combati e efectonan di Covid-19.
El a duna un actualizacion tambe tocante e vacunacion y kico cifranan ta indica. E prome y di dos vacuna cerca personanan mayor di edad tin un porcentahe di casi 80 di full Aruba, y esey ta un bon porcentahe, e dignatario ta remarca.
No obstante e di tres shot, cu ta e booster-shot, lamentablemente por mira cu esnan riba sesenta aña, solamente 54% a busca esaki, siendo cu e prome tin mas cu 60% cu a tume. Esnan riba 60 aña tin e posibilidad di haya e di dos booster shot, pero lamentablemente, solamente 8% di esnan riba 60 aña a busca e booster shot aki.
Esnan riba 18 aña e porcentahe di e prome booster ta apenas na 36%. “Pues, akinan ta caminda cu nos ta mira cu tin espacio pa nos por mehora y proteha nos mes. Na e momentonan aki cu tin un interes hopi abao na Aruba pa vacunacion, ni e mobile unit nos tin mas riba caya. Pero bo por vacuna na DVG durante oranan di trabao: 8’or pa 12’or y 1or pa 4’or. No mester haci cita, pero pa yama pa informacion por hacie na 280-0101”, Prome Minister a señala.
Un bez mas Prome Minister a recomenda esnan riba 60 aña di edad, pa bay busca e di dos booster, reiterando cu solamente 8% di nos poblacion tine; y esnan riba 18 aña e ta recomenda pa busca e prome booster, pa asina poco, poco proteha nos mes. E dignatario a expresa cu ta hunto nos mester aumenta e grado di proteccion personal cu cada un ciudadano mester tin pa preveni pa haya covid-19, aplicando e medidanan cu el a menciona caba.
“Berdad no tin hopi hende cu ta bira malo, cu ta bayendo hospital, pero loke nos ta mira si, cu si cada biaha edad bira mas jong of e ta afecta e grupo mas grandi di nos comunidad, e ora ey si nos ta bay haya cu un presion hopi grandi, y nos kier evita esey. E riesgonan ta bay aumenta e cantidad di 701 y ta bay aumenta tambe pa esnan di mas vulnerable den nos famianan, of esnan cu malesanan cronico cu nos mester cuida mas. Pues ta hopi importante pa nos para keto na e vacuna pa nos schedule nos vacunanan completa” e dignatario a indica.
El a sigui bisa cu Covid-19 ta bay keda pa un tempo largo ainda. E no ta bayendo. Mas bien por mira cu tin hende ta hayando e virus aki mas cu un biaha y cu esnan vacuna tambe ta hayando e, danki Dios no cu sintomanan pisa, pero leve. “Pues esaki ta pone cu unico manera pa nos frena esaki ta nos propio comportacion; ta cuida nos mes pa nos evita pa plama esaki. Hacie, sin cu gobierno mester forza bo y bin cu medida pa bo cuida bo mes. Hacie pasobra bo ta stima bo mes, bo famia y Aruba” Prome Minister a conclui.
