E cuater sectornan di Codigo di Proteccion ta bayendo hopi leu caba y ta ancra den ley
ORANJESTAD (AAN) – Den e conferencia di prensa cu a tuma lugar na Universidad d Aruba, señora Sue-Ann Ras a bisa cu, como Coordinador di e Implementacion di e Codigo di Proteccion, trahando for di Ministerio di Asuntonan Social for di aña 2019 y aworaki den Ministerio di Asuntonan Social y Husticia, e proyecto aki ta un stap mas leu.
El a menciona cu e sectornan ta hopi grandi, y un di nan partnernan mas grandi ta Bureau Sostene Mi, entre otro, cu ta funciona como nan “AMK” (Advies Meldpunt Kinder Mishandeling).
Sue-Ann Ras a relata cu nan a traha tur e añanan aki, for di 2019 cu a cuminza hunto cu UNICEF, cu ta brinda nan sosten tecnico pa nan yega na implementacion di locual tabata conoci como e famoso “Meld Code”, nan a bin cu un LBHAM con nan ta bay ehecuta e ley aki, y esey a resulta den e Codigo di Proteccion.
Ras a menciona cu Codigo di Proteccion ta consisti di cinco paso y nan ta traha hopi mas riba e area preventivo, pa nan ta wak nos muchanan realmente, kico ta sosodiendo pero tambe cu nan por tuma pasonan concreto y mas uniform den tur e veldnan aki, cu ta traha direct of indirectamente cu nos muchanan. (E cinco pasonan a wordo splica pa medio di un video na Papiamento y subtitle na Hulandes).
Aworaki, nan ta asina leu den locual ta trata e cinco pasonan concerni, gran parti di loke ta trata sector psico-social, nan ta bezig pa rond af esey aworaki, Ras a menciona.
Den e parti di sector di husticia tambe a yega hopi leu, cu nan Meld Code a yega te den Cuerpo Policial. Na Hulanda no ta uza e Meld Code den Cuerpo Policial, pero na Aruba si ta haci esey.
Sue-Ann a bisa cu nan ta hayando tremendo cooperacion di KPA pa nan por bay un tiki mas leu, kico nan ta encontra y con pa señala esaki na momento cu nan ta bin caminda tin sospecho of abuso di mucha.
Den sector di enseñanza tambe esey ta canando y nan tin cierto partnernan di directivanan di scol cu ta hopi activo, y cu ya caba nan ta yegando na nan plan di implementacion. Incluso, el a bisa, for di SKOA entre otro, y tambe SPOA nan ta bezig ta aplica caba e Codigo di Proteccion den nan maneho y Cuido; nan zorg structura. Esey tur ta sosodiendo actualmente, na 2022.
El a agrega cu a base di esaki, for di aña pasa, nan kier sa con Codigo di Proteccion ta bayendo, unda nan por haci miho, na unda mester empodera pero tambe fortalece e profesionalnan cu ta traha cu esaki. Cu esey a bin na e idea di sinta brainstorm cu Eugene Clementia, pa nos por haci nan prome investigacion base, pa nan por haya dato. Pesey el a pidi Universidad di Aruba pa ta partner como un, cu por ta sigur cu por haci un investigacion asina, unda lo tin un balor agrega pa loke ta traha maneho y Zurainy Arends y Marcetkaube Paskel hunto cu Clementia, cu ta dispuesto aworaki, pa cuminza cu investigacion y nan a haci un apelacion na tur profesional eyfo, sea cu nan ta trahando den e fase di comienzo, of cu ta implementando of terminando di implementa, cu por duna e informacion mas honesto posible, cu por traha cune, y por haya data pa nan wak na unda nan por sigui bay. E ta ancra den ley for di 1 di April 2021, cu tur e profesionalnan di e sectornan social, enseñanza, salud y husticia mester por traha cu esaki. Esakinan tur ta aspectonan preventivo, riba locual ta trata sospecho di abuso di mucha.
